Aizawl July 30, 2023 : Aizawl DC office kang chhe ta sak thatna turin estimate amount Rs. vbc 49.7 ruahman niin, chhawng sariha sak tura duan a ni a, tuna building hlui la dingte hman zui tumna a awm lo.

Mizoram sawrkara Architect office SPIO-in ZALEN RTI zawhna a chhan danin, Aizawl DC office kang chhe ta sak thatna turin sawrkarin sum ruahmanna a neih leh neih loh architect office chuan a  hre lo a, estimate erawh siam niin, a amount chu Rs. vbc. 49.7 a ni.

Aizawl DC office kang chhe ta sak that a nihna tur hian architecture drawing leh estimate siam a ni tawh a, administrative approval nghah mek niin, sak that dan tur ruahmannaah chhawng sariha sak tur a ni a, chhawng hnih chu parking tura duan a ni.

DC office sak that dan tur ruahmanna siam a nih hian sawrkar kalphung angin buatsaih a ni a, sawrkar hotute hnen atangin thurawn lak a ni.

Tuna building hlui dingte hi hman zui theih a awm lo a, chim hlauhawm tak takte a nih avangin humhalh zui chi-ah ngaih a ni lo va. A building hlui ang miniature/model erawh chu a kawt laiah dah tum a ni.

DC office complex sak thatna turah hian thu tawp siamtu tur chu Mizoram sawrkar a ni.

Aizawl DC office hi December 17, 2021 zing dar 3:15 vel khan a kang a, in eng emaw zat a kang ral a. Office kan chhan chhui chiang tur hian magisterial inquiry pawh din a lo ni tawh a, kum 1890-a luah tan niin, a kan lai hian kum 131 a upa a ni.