Aizawl: Doordarshan Director General C.Lalrosanga chuan Aizawl Doordarshan programme chu kumin kumtawp lam atangin nitin darkar 24 chhung (24x7) pek tum a nih thu a sawi. Nimin khan PIB Media Centre, Tuikhuah tlang ah chanchinbumite kawmin DDK Director General chuan, "Aizawl DD programme khaihlak awm lova pechhuak tur hian inpeih thaw khat a ni tawh a, programme hrang hrang live telecast a pekchhuahna atan khawl tam zawk lei kan tum a ni," a ti bawk. Doordarshan chuan tunhnaiah nasa takin hma a sawn chho tih sawiin C.Lalrosanga chuan, "DD channel hi high definition hmanga pek chhuah kan tum a, tluang taka thil a kal theih chuan kan channel te hi smart phone hmangin en theih tura buatsaih kan tum a, phone siamtu company te nen kan in dawr mek a ni," a ti a. Kum 2017 ah chuan India chu China dawta smart phone hmang tam ber ram ni tawh turin mithiam ten an chhut niin a sawi bawk. DG in hmasawnna a sawilan zingah DD news chu saptawnga puan english news zingah India rama entu ngah ber a ni tih a sawi a, Doordarshan-in satellite channel 35 a neih zinga 22 te chu DTH hmanga entheih a ni tawh tih a sawi bawk.