Aizawl October 21, 2023 : Aizawl district chhunga Polling Station awm zawng zawng atang 60% chu webcasting neih tur a tih a ni a, webcasting neihna tur hmun hi RO te nen inrawn tlangin thlan fel thuai a ni ang. Webcasting nei tur hian Multi Computer Service, Mahishadal Haldia, West Bengal thlan ni a, anni hian a tul ang ang an buaipui ang.

Aizawl DC leh District Election Officer ni bawk Nazuk Kumar chuan DC Conference Hall-ah chanchinbumite kawmin he thu hi a sawi a. Inthlanna felfai leh muanawm neih theih nan leh Model Code of Conduct bawhchhia te vil turin Expenditure Monitoring team hrang hrang Flying Squad (28 teams), Static Surveillance (28 teams), Video Surveillance (18 teams), Video Viewing (12 teams), Accounting Team (12 teams) te din an ni tih a sawi a. Aizawl District ah General Observers 6, Police Observer 1, Expenditure Observer 3 dah an ni tih a sawi bawk a. Polling Officials te tan ni 24-25.10.2023 ah first training hmasa ber neih a ni dawn a, training thawhhnihna hi ni 1.11.2023 ah neih a ni ang a, ni 04.11.2023 ah training hnuhnung ber neih a ni ang. Training hi Govt. Mizo H/S leh HSS school ah te, I&PR Auditorium, SCERT Hall, Golden Hall, Govt. Hrangbana College leh classroom, PUC Academic Block leh ATI ah te neih a ni dawn tih a sawi.

DC chuan Polling party te chu November ni 6 ah polling station pan turin an chhuak dawn tih sawiin dispatch centre hi pathum Chaltlang field, Tlangnuam field leh College/ Venghlui field te an ni dawn tih a sawi bawk.