ZALEN January 17, 2025 : Vawiin khan Rex Zarzoliana Vanchhawng, Superintendent of Police, Aizawl office chamber-ah Aizawl District Crime Review Meeting, 2025 neih a ni a. Meeting hi SP hian a kaihruai nghal a, Aizawl District chhunga Sub-Divisional Officer (SDPO) te, Dy SP (Prosecution) leh Aizawl khawpui chhunga Police Station hrang hranga Officer-in-Charge te an tel a ni

Report-a a lan danin 2024 chhung khan Aizawl DEF hnuaia Police Station hrang hrangah thubuai (case) 1460 ziahluh a ni a. Aizawl Police Station-ah thubuai ziahluh tam ber niin thubuai 489 ziahluh a ni. Heng thubuai ziahluh atang hian Case 712 (48.77%) chu chhuichhuah niin Chargesheet tawh a ni a. Chhui mek Case 404 a la awm bawk. Tin, kumthar 2025-ah January ni 15 thleng khan Case 104 ziahluh tawh niin chung zinga Case 57 te chu chhuichhuah (detect) tawh a ni bawk

He Crime Review Meeting-ah hian kum kal ta 2024 chhunga Aizawl District a crime chungchang te, Aizawl DEF hnuaia Police Station hrang hrang hnuaia thubuai ziahluh bakah dan leh thupek kenkawh chungchanga Aizawl District Police-te hmalakna hrang hrangte thlirlet niin, kum 2025 a dan leh thupek kenkawh leh misual hnuchhui kawnga hmalak dan turte sawiho a ni.