Aizawl: Mizoramah kum 1986 atanga ruahtui tlak dan chhinchhiah a nih atangin Mizoram district 8 zingah Aizawl district chu ruahtui tlak tamna ber niin, chawhrualin kum khat chhunga ruahtui tla chu mm 3151.60 a tling. Hetihlai hian Champhai district chu ruahtui tla tlemna ber a ni. Tun hnai Assembly Budget Session neih zawh taka Finance Minister in a pharh Economic Survey 2016-17 a tarlan a nih danin, kum 1986 atanga Mizoram ruahtui tlak dan chhinchhiah a nih atanga kum 2013 thleng khan Aizawl district chu Mizoram district 8 zinga ruahtui tla tamna ber a ni a, chawhrualin Aizawl district-a ruahtui tla hi kum khat ah mm 3151.60 a ni a, ruahtui tla tlemna ber Champhai district-ah kum khat chhunga ruahtui tla chawhrual chu mm 2319.37 a ni. Mamit district chu Aizawl district tih loha ruahtui tla tamna ber a ni a, hemi hun, kum 27 chhunga kum khat a ruahtui tla chawhrual chu mm 2982.40 a ni a, hemi hun chhung vek hian chawhrualin Kolasib district-ah kum khata ruahtui tla chu mm 2834.00 a ni a, Siaha district-ah mm 2611.30 tla in, Lunglei district-ah mm 2596.50 a tla a, Lawngtlai district-ah mm 2383.00 a tla a, Serchhip district-ah mm 2390.80 a tla bawk. Mizorama ruahtui tlak dan chhinchhiah a nih atan kum 1986 atanga Mizoram a ruahtui tlak tam ber kum chu 2003 niin, hemi kum a Mizoram pum a ruahtui tla hi mm 3081.06 mm a tling a, ruahtui tlak tlem ber kum chu 2014 kha  niin, ruahtui mm 1891.07 a tla.