ZALEN, July 1, 2024: Aizawl District Jail-a kum 1 chuang lo tang reng tawh, jail-a khung anih laia naupang la ni si pakhat vawiin khan hmuhchhuah a ni.

Vawiin July ni 1,2024 khan Jail Inspection Team, Aizawl-te chuan Principal Magistrate, Juvenile Justice Board, Aizawl hoin Aizawl-a District Jail, Central Women Jail leh Central Jail-te an tlawh a, naupang jail a tang an awm leh awm loh an enfiahnaah thil tisual nia puh a tan hunlaia kum tling lo ni si pakhat an hmuchhuak a ni.

ZALEN thudawn danin a tan tirha naupang la ni si hi mipa niin kum khat aia tam tang tawhin nikum 2023 March khan Aizawl District Jail-ah khung a lo ni tawh a. Tunah hian kum tling tawh mahse Juvenile Justice Board-ah a chungthu rel tura chhawp chhuah leh tura hmalak tur nia ngaih a ni bawk. 

Jail Inspection hi thla 3 dana neih thin a ni.

Thudawnnain a sawi danin, "Kum tling lo naupang dan bawhchhe zingah thenkhat chu an awmna tur Observation Home (OH) pumpelh dan an ngaihtuah thin a, Jail-a awm dan an ngaihtuah ve thin bawk a, OH ai hian Jail lam hi zuk leh hmuah lamahte a lo zalen deuh zawk a, an thlahlel thin niin hnathawkte'n an sawi thin," a ti bawk.

Jail Inspection Team-te hian District Jail Aizawl ah hian "Inauguration Programme of New Criminal Laws" an hmanpui nghal a ni.