Aizawl: Health & Family Welfare department hnuaia Food & Drug (F&D) wing in thla hmasaa Aizawl khawpui chhunga ei siamna hmun hranga hrang 102 an enfiah a, an zinga a chanve in eisiam phalna license an nei lo. Thudawn danin ei siamna hmun thenkhat chuan license neih a tul tih pawh an hre lo a. Eisiamna dawr thla khata Rs nuai 1 chunglam lalut te chuan license an neih ngei a ngaih thu leh Rs nuai 12 chin chunglam lalut te chuan registration an tih a ngai a ni. Ei siamten thianghlimna lamah hma an sawn tih sawiin F&D hotute chuan hotel leh restaurant lian chuan PHE tui an rin thin avangin a ngaihthatthlak niin an sawi a. Hetih lai hian vai thingpui dawr leh new market a thingpui dawr te chuan vai tui kawt ho tui an chawi tir thin a, khawia mi nge an chawi tih a chian loh thin thu an sawi bawk. Hetih lai hian Safety & Standards (Licensing & Registration of Food Business) Regulations 2011 tehna atanga tling zo lo eisiamna hmun F&D-in a hrem an la awm lo a, court a kalpui ngaite pawh an awm naa department lamin hma an la la thei rih lo niin an sawi a ni.