Aizawl October 10, 2024 : Vawiin khan AFC President Robert Romawia Royte, MLA leh General Secretary Hmingthansanga Zadeng te chuan Mizoram Governor Hari Babu Kambhampati chu Raj Bhavan-ah Aizawl Football Club aiawhin an kawm a. Aizawl FC aiawhte hian N. Lungleng-a AFC Football field a phullem phahna atana Cheng nuiai 546.90 pek tawh chu cancel an hlau tih an hrilh.

AFC chuan heng sum te hi Power Finance Corporation (PFC) atanga an dilchhuah anih thu leh MSSC chu Implementing Agency a ruat anih thute, 11.10.2023-ah Agreement sign ni tawh mah se, Election Model Code of Conduct avanga Sawrkar hmasa hunlaia thawh hman a nih loh thu leh vawiin thlenga hmalakna a awmloh avanga sum sanction cancel an hlauh thute Governor hi an hrilh a ni.

He sum hi Aizawl FC project atana sanction anih anga a hnathawk tur pawha midang ruat lova an mawhphurhnaa dah an beisei thu tepawh Governor hi an hrilh a ni.

AFC aiawhte chuan Governor hnenah chuan Nuai 546.90 bakah hian Rajya Sabha MP Fund leh NECS sum thawh ve turte nen tanghova field gallery te pawh siam tel an tum avangin midang thawh chi nilova an hriat thute Governor hi an hrilh. Aizawl FC leh Mizoram thalaite tana tangkai tur ro thil anih avangin lo puih ngei a tum thu Governor hian a lo hrilh a ni.

PFC te hian MSSC in hma a lak loh avangin lehkha an rawn thawn a, hmalak loh chhan an zawtfiah mek a, project withdraw an hlauh thu an sawi.

Aizawl FC aiawhte hian Sports Minister pawh an sawipui tawh a, Chief Minister hmuh ngei pawh tumin appointment an dilna chu an nghak mek a ni.