Aizawl: Aizawl khawpuiah hnianghnar taka tui pe turin ni tin tui litre maktaduai 28.72 a mamawh laiin ni tin litre maktaduai 24 vel pump theih a ni a. Kumin bikah ruahtui a tlak zeuh zeuh avangin tui sem kawngah Public Health Engineering Department chuan harsatna lian an la tawk lo.

ZALEN-in PHE thawktute hnen atanga thu a dawn danin Greater Aizawl Water Supply Scheme Phase I leh Phase II ten hna an la thawh theih avangin hnianghnarin mipui hnenah tui pe thei lo mah se mamawh zualpui chu an pe thei nia an hriat thu an sawi a. Phase I leh Phase II-te hian ngawrh taka tui pump-in ni khatah darkar khatte an awl tih loh chu an pump reng avangin mipui hnena tui sem pawh a khaihlak lem lo niin an sawi bawk.

Zawhna chhang PHE thawktute chuan Aizawl khawpui tui lakna ber, Tlawng tui chu a kâm ve hret hret niin an sawi a. Tui tam laia a tam lam flow rate chu 180-te a nih laiin tunlaia a tlem lai chuan tui luang tam lam (flow rate) hi 57-te a ni thin niin an sawi a. Mahse, kumin thalah erawh ruah a sur zeuh zeuh avangin harsatna lian an la tawk lem lo tih an sawi a. Tuna Phase I leh Phase II-in a chawmte an tam tawh em avangin darkar 24 chhung tui hi pump pawh nise hnianghnar chuan hman tur a awm thei dawn lo niin an sawi a. Setlak hmuna tui lakna Phase III chu zawh a nih hun chuan Aizawl hmar lam a chawm theih dawn avangin khawpui chuan tui hnianghnarin a dawng thei dawn niin an sawi bawk.

Tun dinhmunah Aizawl tui in tur hi Phase I leh Phase II hmanga pump-in Tuikhuahtlang  zem lianah chhun luh a ni a, heta tang hian hmun hrang hranga tanky lian-ah sem darh leh thin a ni a. Phase I leh II hian hmar lamah Durtlang leh chhim lamah ZMC, Falkawn, khawtlang lamah Sakawrtuichhun leh khawchhakah Zemabawk thleng a chawm a ni.

Tun dinhmunah Aizawl khawpuiah tui connection nei 71,811 an awm mek.