ZALEN, May 13, 2026 : Vawiin khan Planning & Programme Implementation Department Conference Hall-ah Mission Urban Drain chu K. Sapdanga, Minister, Urban & Poverty Alleviation Department chuan a tlangzarh.

UDPA Minister chuan, 'Kum telin Aizawl khawpui chu lei min leh mual chein min chen chilh a, a chhan lian tak chu tui luan kawr a mumal loh vang a ni a. Tui luan kawr a that chuan khawpui himna, thianghlimna leh khawpui hriselna thlen thei tur anih vangin sawrkarin mipui tan a tih theih a ni,' tiin a sawi.

Hemi avang hian Mission Urban Drain hlawhtlinna atan department hmalakna a tawk a tih loh thu Minister chuan a sawi a. Hnathawh a ni chho zel anga mipui leh Local Council te chu duhtui turin Sapdanga chuan a chah bawk a. Tui luan kawr chu lungrem ni loa RCC a siam a tul thu a sawi a. MLA in area development fund an neihte pawh 80% tal hmang turin a ngen bawk a ni.

Khawpui kawr tha zawk nei tura hmalakna hi 2026-27 chhungin survey, mapping leh planning zawh tum a ni a. 2032-33 ah Mission Urban Drain chu zawhfel vek tum a nih thu Jacob Lalawmpuia, Director UD&PA chuan a sawifiah.

Mizoram leilung chu che awlsam tak anih avangin kawrpui tha ramin a mamawh a. Kawr awmchhunte pawh inzawm mumal lo, design pawh mumal lo a ni a. Hemi vang hian Mission Urban Drain chu siam a nih thu sawichhuah a ni bawk a. 3 Tier system siamin kawr te zawkte chu kawrpuia luangkhawm tura duan anih thu Director chuan a sawi.

SASCI atangin vbc 61.76 atangin hmuh mek a ni a, vbc 35 chu SASCI atangin DPR siam mek a ni.