ZALEN October 18, 2024 : Ni 17.10.2024 (Ningani) zan khan Dawrpui Multipurpose Centre-ah Krismas leh Kumthar vuakveta Halpuah leh Halmawi chungchangah Central YMA chuan Aizawl khawpui chhunga Branch YMA hruaitute inrawnkhawmna a buatsaih a. He hun hi Central YMA President Lalhmachhuana chua a kaihruai.

CYMA Gen. Secretary Prof. Malsawmliana chuan inkohkhawm chhan leh he huna kal te inhmelhriattirna hun a hmang a, Vice President Prof. Lalnuntluanga'n inkohkhawm chhan a sawi hawng a. Krismas leh Kumthar vuakveta Halpuah leh Halmawi hal that loh zia leh a nghawng te, YMA Branch te thahnemngai taka tan tlan a tul zia te a sawi a. Halpuah leh halmawi khap chungchang ah hian YMA chuan Sawrkar hmalakna a thlawp thu leh mahni Branch huamchhung theuh ah he hmalakna hi Branch YMA tinten chak taka hmalak leh hi kan tihtur anih thu a sawi.

Naupang kum tling lo zan len khuahkhirh a tul zia leh hei hian khawtlangah sualna a tih punlun dan te, tleirawl insual rawn a hluar dan te a sawi bawk. Insualrawn thleng fo hi ruihtheih thil tih avanga lo thleng a ni, a ti.

He hun hman puitu Home Minister K. Sapdanga chuan dan leh thupek hmanga halpuah leh halmawi khap tur hian Sawrkar chuan khaih taka hma a lak tur thu leh Sawrkar hnathawk inhnamhnawih chu hrem an nih tur thu te, Sawrkar hmalak tum dan te a sawi a. YMA te nena thahnem ngai taka kan tanrual chuan a hlawhtlin ngei a beisei thu a sawi.

He hunah hian Aizawl khawpui chhunga YMA Branch hruaitu 500 chuang an kal.