Aizawl: Kum 2030 a Aizawl khawpui awmdan tur ruangam 'Aizawl Master Plan 2030' (Vision 2030) chu kumin kumtir atangin AMC chuan a kalpui tan a, insak chungchangah hmalak ni tawh mahse khawpui zauhna ah erawh chuan hmalak a la ni hrih lo. Zalen palaiin a biak naah Planning Secretary Dr. Vanlalramsanga chuan khawpui zauhna tur chu an en reng tih a sawi a. "Aizawl khawpui chhehvelah hian khawpui zauhna tur ram awl a awm leh awmloh kan thlithlai reng a, mimal ram zau tak tak a awm hian min tibuai a. Khawpui zauhnan hmang dawn ta ila compensation pek tur thahnem tak a awm dawn avangin harsatna kan tawk dawn a, hmalak chak a har deuh a ni," a ti. AMC Commissioner Dr. H.Lalthlangliana pawhin khaw -pui chhung enkawlna lamah an la buai hrih deuh avangin khawpui zauh lam an la hawi hmanlo a, an inbuatsaih mek niin Zalen a hrilh bawk. Aizawl Master Plan 2030 hnuaiah hian insak phallohna hmun siam a niin, a bikin Chanmari-Chaltlang leh Bawngkawn-Durtlang inkar te chu insak phallohna hmun ni tih AMC Commissioner chuan Zalen a hrilh a. "Heng hmun humhalh bikah hian dan zawm lova in sa thar an awm kan hre lo a. Chaltlang chhova in sa 1 chu thiat leh turin 'warning' kan pe a, a thiat duhlo anih chuan kan thiatsak ang," tiin AMC Commissioner chuan Zalen a hrilh bawk a ni.