ZALEN June 20, 2026: Aizawl Mihlun Thlahte Inkhawmpui Lian 'High Council' chu vawiin khan Aijal Club a neih a ni a, Lok Sabha MP, Richard Vanlalhmangaiha chuan khuallian niin a hmanpui a, he hunah hian an pawl hruaitu tur thlanna neih a ni.

Khuallian Richie-a chuan, Aizawl Mihlun Thlahte pawl a ding chu lawmawm a tih thu leh thlahtute avanga he pawl zahawm taka a tel ve thei chu lawmawm a tih thu a sawi a. Aizawl khawpui chuan hmangaihtu leh neitu thinlung pu mi a mamawh a ti. Aizawl chu rel lo luh hnuah khualzin miten an tlawh nasat lehzual avangin; Aizawla cheng te chu kawng engkima inbuatsaiha, hmasawnna lam hawia ngaihtuahna seng turin a sawm.

Aizawl Mihlun Thlante hian an member zinga ram hruaitu atana thlan thar Richard Vanlalhmangaiha, MP leh AMC Corporator Dr. Lalmalsawma Nghaka te chawimawina thuziak an hlan a, Agenda hrang hrang ngaihtuahin High Council rorelna an nei zui a ni.

MJA General Headquarters kaihhruaiin kum 2026 - 2028 chhunga pawl hruaitu thlanna an nei bawk a. Hruaitu atana an thlan chhuahte chu V. Lalnunthara (Mathara), Dawrpui ; K. Liantlinga, Venghlui; Dr. Vanlalruata, Bungkawn ; John Rotluangliana, Dawrpui ; K. Vanlalnghaka, Dam Veng leh Zochhuanmawia, Venghnuai te thlan an ni.

Aizawl Mihlun Thlahte hi kum 2017 June ni 21 khan Pu V. Thanga In, Dawrpui-ah din a ni a. Kum 1950 hmalama Aizawla inbengbel tawh, an tu leh faten an din a ni a. Tun dinhmunah member 1,666 an nei mek.