ZALEN April 28, 2026: Aizawl Mihlun Thlahte (AMT) chuan Mizoram Sawrkar Assembly Sessiona lungrual taka State puala University Aizawla nei tura hmalakna kal zela Mizoram State University Act pass a ni ta chu lawmawm an ti a. Nghakhlel taka State University Act chu a taka a chan hun an thlir laiin hun lo kal zelah a awmna tur headquarters Aizawl atanga Lunglei-a sawn a lo ni ta dawrh mai chu pawi an ti. 

Hei hi nawrna nasa tak avanga Sawrkar pawhin a thutlukna a sawhsawn nia lang te hi pawi an ti lehzual a. Aizawl hi mitin ta, State khawpui ber leh mi tam berin an pan khawm anih avanga zirna sang inpui pawh a awmna hmun awm tak niah an ngai a. State Capital hmasawnna hi chu hmun dang atanga er emaw ep emaw chi ah an ngai lova.

AMT chuan Kum 2024- 2025 reporta a lan danin Mizoram college hrang hranga zirlai awm zat hi 18,935 an ni a. Pachhunga University College (MZU ta) tel lovin Aizawl khawpui huamchhunga zirlai awm zat hi 11,289 a ni a. Hnahthial atanga Lunglei chhim lam area-ah hian zirlai 2,289 chauh an awm a ni. Zirlai tam dan atanga chhut ringawt pawh hian Aizawla, Mizoram State University a awm hi a phu hle a ni. Aizawla College awmsa ho changtlung tawh tak tak te behchhanin; Sawrkar hian sum tam lutuk seng lova State University din thei tura an ngaih laia, a thamral ta chu pawi an ti. 

Mizoram State University din tur hian zirlai tam zawk hmakhua en chungin Mizoram Sawrkar hian hma la se an duh a. Heng thu hi Chief Minister hnenah pawh lehkha thehluh a ni tawh a. Tun hnuah chuan eng issue ah pawh nise, political pressure duhawm lo avanga thutlukna liantham tihdanglam leh thin hi thleng tawh lo se an ti bawk.