- K.Zoremtluanga Mission Vengthlang Tunlaiin kan sawrkarin kan Aizawl khawpui traffic tawt lutuk tihziaawmna turin kawng hrang hrangin hma an la, an hma laknaah an chakin fak pawh an phu hlein ka hria. An hmalakna pawh a thain, mipui pawhin kan support a pawimawhin a tul hle a ni. Amaherawhchu, kan khawpui ber Aizawl hi plan awm miah lova din chhoh nawk nawk a nihna hi a lang chho zel a, a la lang chho zel dawn bawk a. Hemi chungchangah hian kan tun generation leh generation lo la awm chho zel tur ten kan buai lutuk loh nan chuan politician, Minister leh MLA hmathlir nei tha leh a ngaihna hria kan mamawhin an pawimawh takzet zet a ni. Tuna kan sawrkar hmalakna pakhat motor parking neih vek tur leh parking garage nei lo tan motor register theih loh atih hi hman a nihna pawh kum thum (3) vel bawr chu a lo ni tawh reng a. Mahse, khawng taka kalpui a nih loh vangte pawh a ni thei ang a, he Dan an kalpui hnuah motor neite pawh an lirthei park-na hmun nei lova kawng sira la dah mai mai hmuh tur a la tam khawp mai. Mizo hi hnam ho ang reng tak kan ni a, Dante hi khawng taka kalpui anih loh chuan a nam nul theih chung chu nam nul hram hram hi kan tum tlat zel a. Amaherawhchu, a Dan kengkawhtuten an kengkawh that erawh chuan thu awih em em kan ni thung si. Hemi chungchang tichiang em emtu chu sun control bel khapna leh bel tawh pawh hlih tur a tih khan kar khat vel chauh hun kha a awm a, chumi chhung chuan a bel tawh pawhin rang takin kan hlip vek a nih kha. Mahse, hun a lo kal a, bel leh theih tih pawh awm chuang lo mah se kan bel leh deuh ta sup sup lehnghal mai a; chuvangin, kan Dan neihte hi hun a liam deuh chuan kan theihngilh mai thin avangin khawng taka kal marpat reng a tul hle a ni. Kan khawpui traffic jam nasa lutuk pawh hi a chhan lian ber pakhat chu kan khawpui chhunga parking lot kan nei mumal lo lutuk hi a ni. Kan sawi tawh angin Aizawl hi plan awm miah loh a din/sak chhoh bawrh bawrh a nih hmel ber a, tlem laite chu an lo plan a ni thei e. Mahse, a tu-a pawh hausa emaw, rethei deuh emaw pawh hian kan insak danah teah hian plan thui tak chu kan nei hlawl lo tih a lang reng a, khawpui pawn deuhva awm ai chuan a hausate pawhin khawpui chhunga inek beng nghek hi kan la duh tlat zawk si a. Khawpui pawn deuhva thawl helh hawlh, mahnia fianrial nuam taka awm ai chuan khawpui hulum leh chep tak bang leh bang in si, chutiang kara awmte leh veng lun deuh laia mi inchung boruak ringawt pawh to tak takin kan la lei duh zawkin kan la lei ngam tlat a. Hei hian khawpui a titawtin a titawp zual a ni mai lo va, a tihthianghlim aiin a tibawlhlawh lo thei lo a ni. Chu chuan boruak thianghlim lo a siam zualin mihring hriselna thlengin nasa takin a nghawng lo thei lo bawk a ni. Chuvangin, mi retheite tan chuan tih ve vak ngaihna a awm lo a ni thei e; mahse, kan mi hausate tal hi chuan kan khawpui pawn deuha residential taka awm intihhmuh chhoh hi chu a hunin a tha tawh khawp mai. Kan topic lo lamah kan peng nasat lutuk hmain kan topic lamah lut leh tawh ila, kan economy te thangin zelin kan chhungkua theuh pawhin hma kan sawn ve zel a, hmasawnnain a ken tel kan mamawh ber chu ni lo mah se kan nunphung tiawlsam turin chhung tin deuh tho in lirthei kan nei fer fur hlawm tawh a. School kal lai naupang license nei thei rual pawh la ni lo atanga ni tin inhlawhfa chawp, NLUP pawisa dawn atanga lei thlengin kan nei deuh vek hlawm tawh a. Chung zawng zawngin kan mamawh vek chu a parking a ni si. Chu park-na chu in sa tawh leh sa mek thleng pawhin a ni ang a, 90% chuan kan insaka kan hisap tel miah lo a ni si.Tun kum 2, 3 liam ta thlenga mak ka tih em em chu in ropui tak tak te, hotel, dawr etc changkang tak tak kan sa a; mahse, parking erawh kan la siam tha mang chuang miah lo hi a ni. Kawngpui ânah in kan sa a, lirthei la nei lote pawhin lirthei eng emaw kan la nei ve ang a, chung huna kan dahna tur chu tih awm miah lovin in kan sa a. A nei tawh sa pawhin kan lirthei dahna tur chu tlemte chauh siamin kawngpui nek hisap ni awm takin kan siam a, a chanve kan ram chhungah a chanve kawngpuiah dahin, ‘tiang chuan kan lirthei dah dan hi kan la hisap tlat hi a pawiin a tha lo takzet a ni. Dik tak chuan hmun nei tha leh parking siam nachang hria chuan sum lakluhna tha leh awlsam tak a nihzia an hrechiang viauin a rinawm. Kawngpui anah dawr te siam/sak ai chuan parking lot tlemte pawh nise sak hi a hautak lovin a hlawk daih zawk. Electric, tui bill ngai lo a, maintenance tul a tlem bawk si, chuvang chuan kawng ânah ram kan neih a, in kan sa a nih chuan kawng an floor khat dawrte siamnan emaw min in luah tura hautak taka toilet, tui dehna, room pindan siam ai chuan chutiang engmah sum seng miah lova parking lot siam hi a tha daih zawk, kan intih hmuh a hun tawh khawp mai. Chhungkaw tin deuh thawin lirthei kan nei tawh a, mi in luah pawhin two wheeler mai ni lovin car changkang tak tak thlengin an nei fur tawh nen, Necessity a ni tawh a. A demand a sang tawhin, a sang chhoh zel hmel bawk nen; chuvangin, hmun lo ram nei tha deuhte tan chuan parking lot siam hi thil tha tak leh tih chi tak ani. Sawi tawh angin kan khawpui tawt lutuk tihziaawm nan hian parking lot tha Aizawlah hian kan neih deuh nual a ngai a; mahse, chutiang hmun erawh chu a vâng tawh khawp mai a. A awmchhuna ka hriat hi ka’n rawt duh a, vanneihthlak takin sawrkar ram a ni hlauh bawk a. Sawrkar hian ngaihtuahin hma la thei se a tifuh ang maw le! Chu hmun chu New Life Hospital chhak, Govt. Higher School quarter awmna saw a ni a. A awmna hmun saw sawrkar office lian tak tak a awm bakah Mizorama kan school lian ber awmna niin Aizawl khaw chhungah pawh location pawimawh tak a ni a. Sawti chung sawn High school quarter tawih tawh tak, luah chakawm loh tak chauh saw a awm a ni mai a, hman tangkaina tur a tam tehlul nen. A hmun saw kawng leh kawng inkar a nih avang sawn parking lot building atan a rem em em mai a, kawng hnuai atangin kawng chung thleng sawn chhawng sarih (7) emaw, chhawng riat(8) emaw a ni ang a, a aia sang chhawng 10 thleng pawhin a sak theih ang a, a tul dan azirin floor khat chu quarter atan a hman theih tho bawk ang a. A sak nan kan sawi tawh angin in pangngai a nih dawn loh avangin sum tam tak sen a ngai dawn lo va, a ban leh a chhuat leh tlak dalah railing etc deuh zawng kha a ni mai a, insen teuh a ngai dawn lovin a hautak lo hrim hrim. Chhunah sawng lai office leh dawr zawng zawngte leh a dawrtute tan parking tha tak a lo ni ang a, zan lamah lah a awmna veng Zarkawt leh Chanmari tan him taka dah theihna a lo ni bawk ang a. Motor eng emaw zat a len dawn avangin Dawrpui to Chanmari traffic chu matheilovin a ziaawm ngei ngei dawn. Chuta sawrkar tan sum lakluhna tax tha tak a lo ni bawk ang a, a sakna senso chu kum 3 chhung chuan a lalut theih ngei ngei a rinawm. Millenium Centre parking kan parking lot neih that ber, motor tam pawh leng lo pawhin kum khat tender nuai 100 dawnin an chhang thei a, Millenium parking capacity let 4 vel tal a nih thei hmel bawk nen. Sawrkar tan income tha lutuk a ni ang a, mipui tan thil tangkai tawp, khawpui tan traffic tawt tiziawm thei tur ni bawk si hi chu thil tha tawp a ni ringawt. He ka rawtna hi a bialtu AMC Councillor, MLA leh a concern Minister te hian lo chhiar vein hma la thei se chuan tam takin kan khawpui tawt lutuk leh traffic jam hi chu a tiziaawm ngeiin a awmna veng leh a thenawm vengte leh Aizawl mipui hi chuan kan chhawr tangkai viau ang maw le. Mipuite min VIP-tu kan sawrkar chak tak hian mpuite mamawh anih tih hriain he thil hi hma la ngat sela chuan Aizawl traffic tawt lutuk mai ni lovin sawrkar ngei pawh hian a hlawkpui ngei ang.