Aizawl pawn-ah ADFA huaihawt LPS Cup chhuak hman trep || Champion Sihphir Venghlun
![](https://zalen.s3.ap-south-1.amazonaws.com/images/news/1711202389_ADFA.jpeg)
Aizawl March 23, 2024 : Goalkeeper Zoliansanga'n penalty vawi hnih a dang a, zirtawpni zan Mahindra XUV3OO LPS Cup final-ah Sihphir Venghlun-in 1-1-a an inhnehtawk hnuah penalty pet hmangin Kawnpui Joint an hneh.
Aizawl District Football Association (ADFA) leh LPS buatsaih Mahindra XUV3OO LPS Cup final-ah Rajiv Gandhi Stadium, Mualpui-ah mipui thahnem tak an pung khawm a, hun tawp dawnah Lalrintluanga'n Kawnpui Joint hmahruai nan a pet lut a, minute 90 hnuah Lalmuanpuia'n Sihphir Venghlun chhanhimin an si phurh a sut a ni.
Minute 30 hun pek belh an khelh chhungin goal dang a luh belh lo va, penalty pet hmanga a chak zawnnaah Divya Player of the Match Zoliansanga'n Kawnpui tana pen chhuak hmasa pahnih Lalkrossmawia leh C Zomuanpuia pet a dansak ve ve.
Malsawmtluanga, Roneihsanga, Lalramluaha leh Ricky Lalramnghaka'n Sihphir Venghlun tan chhuih lut vekin 4-1-in an chak a, a vawi khat nan khua leh veng inelna lianah an champion.
Sihphir Venghlunin an khaw football chanchina hun ropui thlentirin, fair play lawmman an dawng tel a. Stadium chhungah mipui sang telin champion an lawm zui nghal a, nikum khan khua leh veng futsal inelna lianah an champion tawh bawk a ni.
Aizawl District Football Association buatsaih team 62 inelnaah hian final luh phu ve ve team pahnih inkarah Sihphir Venghlunin inkhel thunun hnem zawkin goal hlauhawm an siam chhuak tam zawk a, minute 35-ah Malsawmtluanga ball pek um falin Lalmuansanga'n goal chungah a pet chhuak.
Second half tirah Kawnpui tan Rintluanga'n goal a thawk chhuak teuh hle a, vei lam atanga a siam chu centre-back Lalruatsanga'n dang pialin goal kham a per a. A hnu lawkah JH Lianzuala'n hnai tak atangin Sihphir Venghlun tan hun tha bawhpelh ve lehin goal zawn lovah a tauh chhuak a ni.
Hun pangngai tawp nan minute thum a la awm tihin Rintluanga'n Albert Zohmingmawia'n tha taka ball a pek luh a um fal a, Zoliansanga pet khumin nalh takin a khung a, Aizawl district pawn atanga sawm bik team pali zinga mi Kawnpui'n champion an hnaih hman hle.
Minute 90 hnu hun pek belh minute thumnaah Ricky-an corner pet Muanpuia'n a tauh lut a, Sihphir Venghlunin hlim takin goal an lawm a, phurna sang zawk nen hun pek belh minute 30 dang khel zui lehin Lalmuana vanneih zan ni se thun ngei theihna remchang a nei.
Minute 103-ah Sihphir forward hian tha takin pet mah se Kawnpui goalkeeper che tha tak Lalhriatpuia'n a dansak a, a hnuah tournament best layer Joseph Lalthafela'n ding lam sir atanga a vawrh luh chu goal pawn chiahah a tauh chhuak bawk a ni.
Kawnpui hmatawngten chet an harsat a, goal sarih thun tawh leh top scorer Mawitea'n hnuhma a nei thei lo va, tournament chhunga penalty pet an hmachhawn hmasak berah chhuih lut lo nghalin Aizawl district pawn atanga champion hmasa ber nih an tumna a thamral zui ta a ni.
FINAL
SIHPHIR VENGHLUN VC 1-1 (4-1 pen) KAWNPUI JOINT VC
⚽SV : Lalmuanpuia 90+3'
⚽KP : Lalrintluanga 87'
AET
Sihphir Venghlun VC won by 4-1 on PS
Divya player of the match : Zoliansanga (J. No 88, Sihphir Venghlun VC)
Lawmman
🏆Champions : Sihphir Venghlun VC, ₹ 1,50,000/- Medal, Certificate & Trophy
🥇Runner's Up : Jt VC Team, Kawnpui, ₹ 700,00/- Medal, Certificate & Trophy
🥈Semi Finalist : Vaivakawn LC & Bethlehem Vengthlang LC, ₹ 20,000/-
🛡️Fair Play Award : Sihphir Venghlun LC, ₹ 10,000/-
🏅Best Player : Joseph Lalthafela (J No 17, Sihphir Venghlun VC), ₹ 5,000/- Certificate & Trophy
🎖️Top Scorer : Lalkrossmawia (J No 9, Jt VC Team Kawnpui- 7 goals), ₹ 5,000/- Certificate & Trophy
Latest News & Chhiar Hlawh
-
1m | Sep 07, 2024
-
2m | Sep 07, 2024
-
1m | Sep 07, 2024
-
1m | Sep 07, 2024
-
1m | Sep 06, 2024
-
1m | Sep 06, 2024
-
2m | Sep 06, 2024
-
3m | Sep 06, 2024
-
1m | Sep 06, 2024
-
1m | Sep 06, 2024
-
2m | Sep 06, 2024
-
1m | Sep 06, 2024
-
2m | Sep 05, 2024
-
1m | Sep 05, 2024
-
1m | Sep 05, 2024
-
1m | Sep 05, 2024
-
2m | Sep 05, 2024
-
1m | Sep 05, 2024
-
1m | Sep 05, 2024
-
1m | Sep 04, 2024