Aizawl; Aizawl Police Station panna kawngpui chu a hma aia hniama rawt a, tih zauh tum a ni a, helai hmun hi nimin zing khan AMC Vice chairman Lalrinenga Sailo leh bialtu Councillor PC Lalruatsanga ten an en a ni. Aizawl Police Station panna kawngpui, Bazar kawng chung zawk siamdan tur enna ah hian AMC ward no 9 bialtu Councillor PC Laruatsanga chuan kawngpui awmsa hi a hnuai zawk level a lak hniamin a hma aiin a zau hret thei dawn a, Aizawl khawpui chhung cheina a nih mai piah lamah lirthei inher vel tan pawh a awlsam zawk beiseina avanga rawtna hi awm a ni a ti. AMC Vice Chairman Lalrinenga Sailo chuan Aizawl khawpui hian ngaihsaktu leh enkawltu a mamawh a, a enkawltu tura din AMC hi kum 2010 atanga din hian hmalakna lian tham engmah sawi tur a la nei lova, theihtawp chhuaha hma kan lak vat vat loh chuan khawpui chhung enkawl tur hian kan tlai lutuk ang tih a hlauhawm tawh hle a ni, a ti. Er. Lalawmpuia, CE PWD Building pawhin Councillor in rawtna a neih anga kawngpui rawt hniam chu tha a tih thu sawiin, he hna in kentel leh nghawng turte pawh uluk takin a hmunah endik nise, estimate pawh mumal taka siam a ngai dawn niin a sawi. Aizawl SP C.Laldina pawhin kawngpui rawthniamin a nghawng tur chhut tel tur leh tuna Aizawl PS building foundation khawih lo zawng leh parking Area tur ruahmansa veka estimate siam nise a a that a rinawm thu a sawi bawk.