ZALEN February 8, 2026: Kum 2020 atanga 2025 inkar chhungin Aizawl sahuan atangin ramsa/sava bo 8 an awm tawh a. Ramsa/sava bo thubuaiah hian Sairang PS-ah FIR theh luh a ni a, a mawhphurtu man an la awm lo.

ZALEN RTI zawhna, SPIO, Aizawl Wildlife Division chhanna atanga a lan danin sahuan atanga ramsa/sava bote chu Fischer’s lovebirds (Orange Beak), Blue & gold Macaw Bird, Flame Powerbird, Red faced Spider Monkey, Indri Lemur, Rufous Hornbill, Lears Macaw leh Pesquet Parrot te an ni.

Ramsa/sava bo zingah hmuhchhuah an la awm lo va, zawn mek pakhat a la awm tih a sawi a. Ramsa/sava bo thubuaiah hian Sairang PS-ah FIR theh luh a ni a, heng thil boah hian mawhphurtu man an la awm lo tih a sawi.

Aizawl Wildlife Division SPIO chuan ramsa/sava bo chungchangah hian FIR thehluhin CID leh Mizoram Police 3rd MAP Battalion te sniffer dog hmangin zawn an ni a, AMC surveillance-in chhui zui a ni tih a sawi.

Ramsa/sava bote hi mut reh lai, zing dar 1 leh dar 4 inkar vela bo nia hriat niin sahuana an awmna tur bika siam, chumi chhunga mi chu a bang net kar chhiain a chhungah an lut a, an man ni a hriat a ni, tih a tar lang bawk.

Aizawl Wildlife Division SPIO chuan kum 2020 atanga 2025 inkar chhungin Myanmar leh state dang atanga ramsa leh sava tawlhruk 1,094 a awm tih sawiin heng ramsa leh sava tawlhruk kaihhnawihah hian kum 2025 chhungin Champhai Division-ah mi pariat man an ni tih a sawi.

Aizawl sahuanah ramsa 171 leh sava pariat a awm mek a, hetah hian exotic animal chhiar tel a ni lo.