ZALEN April 19, 2026 : Mizo National Front (MNF) Treasurer Lalruatkima chuan naktipa Aizawl Municipal Corporation inthlan lo awm tur chu khawpui sawn duh leh duh lo bukna a ni dawn niin a sawi.

Nimin khan Aizawl Press Club-ah chanchinbu mite kawmin Lalruatkima chuan, “Chief minister-in Mizoram khawpui chu mi cheng kan tam tawh avang leh traffic tawt avangin mi nuai 10 chen theihna tur hmun danga din tura ruahmanna a siam hi kan duh lo a. Tun laia a tourist tam takin Aizawl traffic nawmzia an hmu a, YouTube hmangin sum siam nan an hman mek laia hmun danga sawn tum hi kan duh lo a. Tun tumah hian state capital sawn duh leh duh lo buk a ni dawn a ni,” a ti.

Leiba salah Mizoram a tang mek nia sawiin MNF treasurer chuan, “Kum 2023 MLA inthlan hma khan ‘sum kan puk ve lo vang’ tiin ZPM hotute an campaign a. ZPM sorkar hian nasa takin an puk a, hei vang hian leiba salah Mizoram chu min hruai lut ta zawk a. Budget session hnuhnung berah pawh budget pum pui, Rs. vbc 17,076.92 niin Mizoramin leiba kan neih erawh chu Rs. vbc 19,085.15 lai a ni ta mai a, Rs. vbc 2,008.23 zetin budget aiin leiba a tam zawk a. Leiba sala Mizoram hruai luttu sorkar hi mipuiten an hnawl ngei kan ring,” a ti bawk.

Lalruatkima chuan ZPM chu sum enkawl kawngah an hlawhchham a. Lunglei khawpui hmasawnna tur, LMC sum chu a zawnin (FY 2024-25)-ah Rs. nuai 923.12 leh FY 2025-26-ah Rs. nuai 946.80. belhkhawmin Rs. nuai 1,869.92 lai an ti-lapse a. AMC sum Rs. nuai 1,526.60 an ti-lapse a. Tun financial year tawpah sorkar inthlahdah vangin SASCI sum Rs. nuai 11,152.00 zet a lapse bawk tih a sawi a. Restricted tender chungchangah pawh MNF kum nga sorkar aiin ZPM sorkar kum hnih chuang awrh chhungin hna an pe tam tawh tih a sawi bawk.

Lalruatkima chuan Aizawl khawpui thenfai an tum tih sawiin thalai ruihhlo ngaite an zalen a, langsar takin zu leh drugs an hmang nia sawiin heng a bo theih nan theihtawp chhuaha Aizawl nuam leh thianghlim ni turin then fai an tum nia sawiin MNF chuan AMC-ah candidate an nei tha ber nia a hriat thu a sawi bawk a. AMC election lo awm turah MNF chhinchhiahna Arsi-ah vote theuh turin Aizawl mipui zawng zawng an ngen tih a sawi bawk.