Aizawl: Sawrkar laipuiin khawpui thlanbik tih hmasawn bik tura a thlanchhuah 'Smart City' zingah Aizawl chu thlan tel ni mahse project thehluh ah duhthusamlo lai deuh a awm avangin hamthatna dawng tura thlan a la ni lo. Smart City ruahmanna thar hi June ni 29,2016 (Nilaini) khan thehluh that leh a ni. Zalen thudawn danin Ministry of Urban Development chuan India ram khawpui 100 te chu a bika tih hmasawn turin a thlang a, chung khawpui thlanchhuah 100 zinga 97 chuan smart city atana ruahmanna an neihte chu an thehlut a, heng zingah hian khawpui 97 chu smart city atan hian pawm a ni. Heng atang hian khawpui chei tur bik 20 thlanchhuah leh a ni a, mahse round 1 a tling khawpui te hian India ram state hrang hrang a huap zolo deuh nia Ministry lamin a hriat avangin khawpui thlanchhuah bik 23 te chu 'Fast Tract Cities' tia vuahin an ruahmanna te thehlut tha leh turin a ti a. Heng khawpui 23 zing atang hian khawpui 13 chu smart city hamthatna sum dawng thei tur an ni a, ruahmanna thehlut zingah hian Aizawl pawh a tel a, mahse point 1 in a tling zo lo. Aizawl tlinlohna chhan hi Ministry of Finance leh Ministry of Urban Development te thuchhuak inanloh vang leh inhriatpawh tawkloh vang te, khawpui dang ten sum intumsem dan turah 50:50 anga project an siam laiin Aizawl chuan 90:10 in an siam vang niin UD&PA Secretary Dr. Vanlalramsanga chuan Zalen a hrilh. Smart City atan hian Aizawl chu thlan a ni tawh a, khawpui tihhmasawnna tur sum hi a dawng dawn tho a, mahse proposal nei tha ten an dawng hmasa dawn a ni. 2nd round ah hian khawpui 64 te chu an inel leh dawn a, Aizawl khawpui chu thlan anih chuan smart city sum a hmang thei ve tawh dawn a ni. Smart city tur hian tui, eng, inkalpawhna, boruak thiangthlim, IT tha te bakah hriselna tha te mipui a bikin hmeichhia, naupang leh upa zawkte him leh zalen taka awmtir te chu a tum ber a ni.