May 11, 2023; Aizawl SP chuan High Security Registration Plate (HSRP) hman pawimawh zia hre thar chunga hmang theuh turin lirthei neitute a ngen.

Vawiin May 11, 2023 a public notice  a chhuah ah Aizawl SP, Stephen Lalrinawma chuan, HSRP chu kum 2012 atangin Mizoramah hman tan a ni tih tarlangin, Ministry of Road Transport & Highway notification angin, lirthei siamchhuaktu company ten April ni 1, 2019 atangin lirthei an hralh chhuah reng rengah HSRP nih dan phung dik taka siamsa, lirthei zuarchhawngtute (dealers) hnenah an lirthei hralh chhuah a pianga belh theih turin an pe zel tur tih tarlan a ni.

HSRP ah hian information hrang hrang, chasis number, engine number etc. dah a ni tih tarlang bawkin, heng information te hi lirthei registration certificate a information nen a inmil thlap tur a ni a, a eng emaw ber inanglo a awm chuan thil diklo awlsam taka hmuhchhuah theih nghal zel a ni.

Aizawl SP chuan HSRP nilo, duh ang leh mawi tih zawng vuah mai thin a nihin, lirthei rutu tan number plate dang bel chawp theihna kawng zau takin a hawn sak tih tarlang bawkin, chhui zui ngaihna awm lova bo hlen ta a tam niin a tarlang.

HSRP hi lirthei neituten an hman vek hunah chuan lirthei rukte chu a tlanna chin leh a kalna lam hawi awlsam taka chhui zui nghal theih a ni dawn a, lirthei neituten HSRP vuahlo reng reng te chu rukbo rinhlelhawm a ni tih kan hriat nghal mai theih nan HSRP hman hi a pawimawhzia hre thar chunga hmang theuh turin Aizawl SP chuan a ngen bawk.