Aizawl Taxi chungchang hi han sawi ve leh ila. Heti taka a tamna chhan bul chu kan politician-ten politics khel nan taxi permit an hmang thin a. STA chhinchhiah dan hi en ni ta se chuan tute sorkar laiin nge phalrai viau a nih tih pawh a hriat theih a rinawm. A tam chhan dik tak hi politics-a inchirthehnate pawh a nih theih bakah tuna sawi hian a tihtlem phah dawn chuan loh avangin umzui lo ila. Thuneitu lam pawh hian taxi tlanchhawktir hi an zuam zawng an nih vanga ti mai aiin traffic tawt tihziaawmna kawnga hmalakna hmasa turah an ngaih vang a nih a rinawm a, a buaipuitu ni ta ila kawng dang a van viau si chuan mi huat hlawh pawh awl tak tur ni chungin an tih a ngai pawh a ni thei. Anni pawh tawngpawng dem ngawt chi an ni bik chuang awm lo ve. Nikum hmasa khan chanchinbu pakhat chuan Aizawl Taxi zirchianna a nei a, a lan dan kha chuan Aizawlah mi 5000 vel taxi hmanga eizawng an awm a. Stand lian deuhah member 100 vel, a te deuhah 50-60 vel an awm tlangpui. Hei bakah hian taxi intlanchhawk hian traffic jam a tiziawm tehchiam lovin a tlanchhuaka te pawh an hlawk sawt chuang lo niin a sawi. Chutih rual chuan intlanchhawk chu khawpui tawt avang tha ti an awm tho niin a sawi bawk. Rawtna han siam ta ila: 1. Intlanchhawk ngawt pawhin awmzia a nei lo a, a chianna chu MNF sorkar lai khan 18 Sept. 2007-ah taxi intlanchhawk hi tih a lo ni tawh a, hman rei a ni lo. Congress sorkar term hmasa tan tirh 2009 September khan tih a ni leh a. A intlanchhawk tur sticker-te beltir an ni a, dodalna thuziakte pawh tar a ni a, hemi tum pawh hian hman rei a ni leh chuang lo. Chuvangin, permit pek chhuah tawh loh pawh hian awmzia nei bawk mah se a sawt ber tur leh tha ber tur hriat a har hle, ngaihdan pakhatah chuan a awmsa DAH BO then hi niin a hriat. Kan sorkar hian Taxi hlui deuh 250 bawr vel tal hi leisak se. A hlui deuh hi chu Rs 150000 atanga Rs 200000 velin a neitute hian an thlah phalin a rinawm, chutianga tih chuan Rs 37,500000 atanga Rs 50,000000 velin taxi hlui lam tawh 250 vel khawpui atangin kan dah bo thei ang a, sorkar sum sen tur lah tam tak a ni lem lo, thenkhatin an eiru nia kan hriat kan buaipui luih luih zat ngaihtuah chuan sum tam vak a nih hmel loh. 2. Chutia kan tih loh chuan Taxi hlui hi replacement siamin a tharah an bel leh a. Chutianga ti lo pawhin taxi permit kha hralhin motor thar neiin an lei a, an hmang chhunzawm leh avangin tuna permit issue loh hian a tam sa a titlem lo a, a tipung lo ringawt a, hei hian khawpui tawt tihthawlna kawngah awmzia a nei thui loh phah niin a lang. A chianna chu tunah hian transport thuneitute hian replacement pawh hi accident-ah chauh tih tur an ti a, chutah pawh accident chhuanlam an tam leh tak avangin accident avang replacement pawh hi an ti leh tawh lo niin an sawi. Sorkarin taxi a leite chu an permit tihtawp emaw district dang, taxi thawlna hmunah emaw hman atan siam danglam ta hlauh se; tin, a motor pawh man tlawm zawka private emaw, district dang veka taxi atana hmang duhte hnenah emaw Auction emaw, man tlawm zawk emawa tihral ni ta se, a leina sum tam tak a hmu let thei bawk ang a, chutianga taxi hlui (a number atanga thliar mai pawh a pawi loin a rinawm) kan tihral teuh chuan Aizawl khawpuia taxi tam lutuk intam chhuah lek lek, taxi stand buaichuar leh taxi tam avanga Taxi driver-te an hminghliau leh thin hi a ziaawm phah ngei a rinawm a, taxi hlui neitute tan pawh a na lutuk lo mai thei. 3. A nih loh vek chuan taxi bik mal thlur lovin motor zawng zawng hi Chief Minister leh Governor em chu a tih chi loh ang a, a bak zawng kan Minister atanga kan officer lian zawng zawng thleng hian intlanchhawk hian min huam vek mai se la. Two wheeler erawh tel ve lo se. Chumi system atan pawh chuan No. inkawp kim leh kawp kim lo ai chuan thil hre zawkten Singapore velah pawh an hman dan system an sawi hi han tarlang ila. Lirthei No. tawp ber digit zel kha en tur a ni ang a. Entir nan Motor No. 2367 chu thla khatah ni 7, ni 17, ni 27 te chawlin thla khatah ni 3 a ding ang a. Motor number 1-a tawp a vanduai deuh ang a, 5341 chu ni 1, ni 11, ni 21 leh ni 31 te a ding ang a, thla khatah ni 4 chawlh a nei ang.?Hetianga tih hian a inrual ang a, vuivai an awm lo thei ber ang em? Hei bakah hian Aizawl traffic jam nasa tihziawmna tur leh kan khawpui tihthawvenna atan chuan taxi intlanchhawk piahah kan mi hausaten kan kawng tet leh chep ngaihtuah lek lova tunlai lirthei lian pui pui, SUV tha leh man to an uar hian kawng a tichep. 407 kar zau zawng tia tho hi chu No Entry hian huam ve ta se, hetiang lirthei lian pui pui, pakhat pawh Maruti 800 pathum man vel bawr nei chin hi chuan lirthei dang pawh an nei tel deuh zel a, an tan a buaithlakin a rinawm loh. No Entry lai chuan lirthei tê zawk hawl chhuah tur an neih a rinawm viau. AMC pawh hian khawpui daia Sumo stand a sawnchhuah hi an ti ta sa sa bawk a, khauh zawkin keng law law se a thain a rinawm. Thenkhat ni khat tlanchhuak miah lo tura an tih laia “kan dinna a hla” tih velte kha chu la ziawm tak tur a ni. A silna siam tur hian kawng sirah filling station-ten an mahni dawr tur tan hmun an siam a, lirthei veivak dang an tibuai lo ang hian hmun nei thei chauh license pein, motor silna hmun hi awmze neia enkawl a hun ta hle mai. Thenkhat hi chuan an sil tur kawngpui sirah an nghahtir a, silfai sa kawngpui sirah vek an hruk hulsak leh a. Chumi innghak leh ding khawmuang chuan lirthei veivak a tih-jam-na Aizawlah hian a awm nual. Khawpui laili lai mihring chenna hmun ‘residential area’ lutuka Hospital leh Hotel dintir ngawt te hi a fuh lo. Parking awm miah lo, hmunhma rem lo takah Damdawi In/Hotel kan bun ngawt a. Damlohna thilah ngat phei chuan damlo na deuh leh rikrum thilah Mizo phei chu kan inmenpuiin kan pungkhawm hluai a, vantlang kawng kan tichep thei hle. Khawpui hian private Damdawi In a mamawh a nih pawhin khawpui lun laiah hi chuan Emergency Service emaw Casualty Duty room chuah nei se, Hospital tak hi chu daifemah hmunhma rem deuhah awm se la. Kan thenawm state leh Delhi-ah pawh khawpui tihzauhna leh then thianghlimna hmanrua atan policy rorum tak tak, (Supreme court order emaw state sorkar thuchhuak pawh ni se) dan loa sumdawnna hmun kharsak te, Excavator (JCB) hmanga in an nawr chhiat rum rum tak mai zela te pawh a awm thin hi maw, kan sorkar pawh hian heti zawnga ngaihtuahna a seng ngam hi a hun ve tawh lo maw?