Aizawl: Aizawl Deputy Commissioner office hotute atanga thudawn danin Aizawl khawpui chhung hnawk thenfai hna ‘Aizawl Beautification Project’ chu zawh a ni tep tawh a, tunah hian an tawpna tur Thuampui an la thleng lo deuh niin an sawi. Aizawl DC office hotute chuan Aizawl Beautification Project chu tluang taka neih zel a nih thu sawiin hnathawktuten an paltlang veng hrang hrang Local Council ten an lo tawiawm tha hle niin an sawi a. Vanapa Hall kawt atanga tan thenfai hna hi tunah hian Bawngkawna Vishal Megamart leh Thuampui inkara petrol pump an thleng tawh niin an sawi. Thuampui an thlen phei hma hian Chanmari atangin Chaltlang lamah thui vak lo an chho phawt a, heta tang hian let lehin Ramhlun kawngah an phei a. Bawngkawn chhuak pheiin Thuampui lam hi an pan leh a, Thuampui zawhah hian Bawngkawn atangin a let zawngin Chaltlang lama an hmabak zawng an tifai chho leh dawn a ni. Aizawl Beautification Project hi kum 2017-a tan niin nikum khan Raj Bhavan atanga Vanapa Hall kawt inkara hrui hnawk leh thil dang thenfai ngai te chu a thawh khatna atan tihfai a lo ni tawh a. Hemi hnu hian Vanapa Hall kawt atangin Dawrpui lamah pheiin tunah hian an tawpna tura ruahman Thuampui an thleng tep tawh a ni.