Mizorama tui lakna lian ber Aizawl chawmtu tui lakna hian fur lai hian harsatna a tawk thin a, hei hi a chhan ber pakhat chu khawpui chhunga cheng te hian kan bawlhhlawh leh hnawm dang te kan paih fimkhur tawk loh vang a ni.
Aizawl khawpui chhunga thli tam tak luan khawmna Tlawng tui hi kan rin leh innghahna ber a nih avangin kan bawlh hlawh paih danah pawh hian ngaihtuah na thui tak kan sen a ngai a, a tui a thiang hlim tawk loh mai piah lamah hnawl leh hnawm hnawk tam takin tui lakna te hi a tihbuai thin avangin mipuite kan fimkhur a ngai hle.
Tun hnai chhovah pawh pawl hrang hrangin tui tlem lai chuhin theih ang angin Tlawng lui leh a fintu lui dang te tih fai hnatlang an nei a, an fakawm hle rualin heng hnatlang te hian nileng daih hnawm tih fai tur an hmu thei zel hian he lui hi a tawp hle tih a ti chiang a. Heng hnawm te hian tui tam lai chuan tui lak chhuahna pipe te hnawhin tui pump theih loh hial te a thleng thin a, a tihfai a hautak em avangin tui thiam te an rawih hial te a ngai thin a, ni engemaw zat tui pump theih loh te a awm hial thin. Tui pump chhuah te hi sawngbawl leh vek ni thin mah se, tui thianghlim lo lutuk ei in atana hmanah a iaiawmna chen a awm lo thei lo.
Septic tank dik taka siam, soak pit atanga tui fim tak rawn chhuak hi a fim hle tawh a, mahse, tumahin ei in atan chuan kan duh miah lo a, a rawn chhuahdan ngaihtuahin in chi a ni lo reng a ni. Chutiang chiah chuan Tlawng atanga tui sawngbawl tawh kan In rawn thleng pawh hi tui an lakna hmun a thianghlim loh miau chuan duhthu chu a sam lo thei.
Mi ram khawpui kawngsirah lui thianghlim tak a luang thei a, keini ramah erawh kan luikawr neih te a tawp em em vek a, lirthei sil nan pawh an duh loh hial a bal te a ni a, an zuk fin Tlawng pawh hi a thianghlim theih nan mawhphurhna kan nei tih a chiang hle. Kan luikawr te hi eng nungcha tan mah han chen ngaihna awm lo a ni a, kan tana hnawksak leh natna min thlentu tho leh thosi te tan erawh hmun duhthusam an ni thung. Chuvangin, tui thianghlim leh hrisel kan neih theih nan kan khawpui leh a vel kawr leh lui te thiamhlim zawka kan enkawl hi kan tih ngei ngei tur niin a lang.