Aizawl: Aizawl khawpui tui chawmtu phase I & II bak a thar 37 mld siam hna chu kumin chhungin thawh tan theih beisei a ni. State Investment Program Management and Implementation (SIPMIU) hmalaknain Industrial Growth Centre, Luangmual bula Setlak lui chhuah zawnah Tlawng lui atangin tui lak tum mek a ni a. He hna thawh nan hian Asian Development Bank atangin vaibelchhe 160 vel beisei a ni a, ADB in remtihna an pek veleh hna tan a ni dawn a, tluang taka thawh theih chuan kum 2019 ah chuan zawh hman beisei a ni. Tun dinhmunah Aizawl khawpui chawm tur hian Reiek kai bulah phase I & II hmangin ni tin 34 mld pump thei tur khawl chuan hna a thawk mek a, mahse khawl hi a hlui tawh deuh avangin a pump theih ang zat (capacity) chu pump zo lovin ni khatah 20-24 mld inkar chauh a pump thei a, tun dinhmun ah harsatna liantham thleng hrih lo mah se nakin lawkah harsatna a awm dawn avangin ngaihtuahna thar sengin hmalak a ni ta nia thudawn a ni bawk a ni. SIPMIU in tui an pump tur hi tluang taka hnathawh theih a nih chuan kum 2045 thleng harsatna awm lova Aizawl chawm thei tura ngaih a ni a. Tuna hman mek phase I&II a tui lak dahkhawlna Tui-khuahtlang ah chhunglut lovin Laipuitlang ah chhunluh a ni dawn a. Laipuitlang hi Tuikhuahtlang aia a san zawk avangin Tuikhuahtlang atanga tui pek dawnin harsatna a awm thin a, he harsatna sutkian nan hian Laipuitlang ah hian chhunluh a ni dawn a ni. Tuna Aizawl khawpui tui semna pipe te hi kum 1988 vela siam tawh leh kum 27 laia upa a nih tawh avangin thawm that ngai a tam tawh hle. Pipe thlak hna hi thawh mek a niin tuizem lian pawh hmun 20 ah SIPMIU chuan an siam tawh a. Power indaihlohna avanga tui pump theihloh awm thin sutkiannan Dihmunzawl ah 132 kv sub station bun mek a ni a, Luangmual atanga Dihmunzawl inkara bun 22 phunna tur ram pawh tihfel (acquire) vek a ni tawh niin SIPMIU thawktute chuan Zalen an hrilh bawk.