ZALEN, Mar. 13, 2026: Aizawl khawpuia branch YMA fai berah Chawnpui Branch thlan a ni.

Zirtawpnia Aizawla Chapchar Kût lawmna pui berah Central YMA, UDPA Department leh AMC tangkawpin ‘Branch YMA Fai Inelna 2025-26’ a buatsaih result hi puan niin Kût Pa, Chief Minister Lalduhoma’n Chawnpui Branch YMA hnenah hian lawmman a hlan a. Lawmman hian Rs. 3,00,000 leh citation a keng.

Lawmman pahnihna latu, Laipuitlang Branch hnenah Rs. 2,00,000, pathumna latu branch pahnih, Electric Veng leh Republic Vengthlang hnenah Rs. 1,00,000 leh citation a hlan bawk.

Aizawl khawpui branch YMA fai inelna hi March 31, 2025 khan Sikukpuikawnah UDPA Minister K.Sapdanga hovin ‘Faina Hnatlangpui’ nen hawn a ni a, October thla atanga endik hna kalpui tan a ni.