ZALEN, Mar. 29, 2025: Thawhtanni hian Aizawl khawpui ‘Faina Hnatlangpui’ neih a ni dawn a, fainaa YMA branch inelna tan a ni dawn bawk.

‘Faina Hnatlangpui’ hi Central YMA, Aizawl Municipal Corporation (AMC) leh UD&PA Department thawhhona hnuaia huaihawt tur niin veng hrang hrangah branch YMA leh local council kaihhruainain an veng theuhva hnatlang tura ngen an ni.

CYMA, UD&PA leh AMC tangkawp hian kum 2025–26 chhung atan Aizawla faina kawnga chak zawka hmalak a nih theih nan thawhhona thuthlung an siam a. An hmachhawp zingah ‘Faina Hnatlangpui’ hi telin ‘YMA Branch Fai Inelna’ pawh neih tur a ni a, hnatlangpui hawnnaah hian fai inelna hi hawn a ni ang.

Hnatlangah hian veng hrang hrang an hnatlan dawn bakah hmun bawlhhlawh zual thlan bikte thian fai turin mi thahnemngai leh tlawmngaite an thawk bawk ang.

‘Faina Hnatlangpui’ hi Sikulpuikawnah chawhma dar 10:00-ah hawn tur a ni a, UD&PA minister leh department hotu te, AMC mayor leh official pawimawhte bakah CYMA hruaitute leh a bul hnai YMA branch aiawhte an tel ang.