ZALEN, August 07, 2025: Aizawl chhehvela sava awm leh hmuh theih chin 228 thlalak leh an chanchin tawi dah khawmna, ‘Birds of Aizawl’ (Pictorial Book) chu Nilaini tlai khan tlangzarh a ni.

Thianho, Da Khualzin (Birders) tia invuahte buatsaih lehkhabuah hian Aizawl chhehvela sava la awm ang ang leh hmuh theih chinte thlalak dah a ni a. Lalnunzira, IFS Rtd.-in Maubawka an chenna inah a tlangzarh. 

He lehkhabu hi color vek niin sava hming, scientific name leh an len zawng dah tel a ni a. Mizo tawnga hming la nei lote pawh eng emaw zat phuah thar a ni.

Sava chi hrang hrang 228 thlalakte hi a buatsaihtu, Da Khualzin (Birders)-in anmahni ngeiin an lak vek a ni a, Google-a dah sa pakhat mah a tel lo.

Thangtharten leh la naupang zawk, sava lam la hre loten Mizo sava an hriata an humhalh zel theih nana an buatsaih a nih thu a buatsaihtute chuan an sawi a. “Thangtharten kan Mizo sava an hre tawh lo va, hmuh tur pawh a vâng tawh bawk a. Humhalh zel nan he lehkhabu hi kan siam a ni,” tiin Da Khualzin (Birders) zinga tel pakhat chuan a sawi.

Lehkhabu hi phek 138-a chhah niin Rs. 200 man a ni.