ZALEN, Oct. 24, 2024: India ram pum huapa kalpui, sikul behchhana inelna lian ber, kum 14 hnuai lamte tana pathum leh pathuma inkhelhna, ACG Jr. NBA 3v3 School Basketball Tournament North East India Zone chu Aizawlah khelh zawh a ni ta.

North East Zone-ah hian state pawn atangin team pathum, mipa team khat leh hmeichhe team hnih an tel a, Meghalaya-a mi ve ve an ni a. Dawrpui Multipurpose Centre Basketball Court-a inelna buatsaih hi Nilainia khelh zawh niin state pawn team thum hi a che tha zual team pariat zingah an tel phak vek.

Tournament hi Mumbai, Maharashtra-ah September 26 khan tan niin Chennai, Tamil Nadu-ah September 28-ah tan leh niin Aizawl hnuah hian Bhubaneswar, Odisha; Delhi leh Ludhiana, Punjab-ah khelh chhunzawm leh a ni ang.

Khawpui hrang hranga inelnaa hmeichhia leh mipa ti tha team riat ve ve chu league phase-ah an inhmachhawn leh dawn a. Heta ti tha pathum ve ve bakah all-star team ten kum tharah hian league finals an khel ang.

Khawvela basketball pawl lian ber, USA-a National Basketball Association (NBA) leh India-a basketball thuneitu sang ber, Basketball Federation of India (BFI) thawhdunnaa buatsaih tournament hi khawvela damdawi siamtu lian ber pawl, ACG Pharma spornsor niin kit partner pawh sports thuamhnaw siamtu lian leh lar, Skechers a ni.

ACC Junior NBA programme hi kum 2013 atang kalpui tan tawh kha niin thalai nuai 140 chuang leh India khawpui 35-ah physical education instructor 15,000 chuang an tel tawh a. NBA-in India-a basketball chawikan nana hma a lakna niin sumdawng company lian, state association leh NBA India Academy te kawng hrang hrangin an thawkho thin.

ACG Jr. NBA programme hi khawpui lian thlan bik tlem tê-ah chauh neih thin a nih laiin India rama sikul basketball inelna lian ber thleng tura Aizawl thlan a ni ve chu thil lawmawm tak a nih piah lamah an tan pawh hlawhtlinna ropui tak a nih thu Mizoram Basketball Association (MBA) chuan an sawi.

AIZAWL ATANGA LEAGUE PHASE-A INLAN TURTE:

HMEICHHIA:

St. Mary’s Higher Secondary School, Shillong (Meghalaya)

Pioneer Missionary School, Aizawl (Mizoram)

Lalmalsawma Memorial School, Aizawl (Mizoram)

CLS Academy, Aizawl (Mizoram)

Living Water School, Aizawl (Mizoram)

Graceland School, Aizawl (Mizoram)

Pine Mount School, Shillong (Meghalaya)

Home Mission School, Aizawl (Mizoram)

MIPA:

Pearly Dew Higher Secondary School, Shillong (Meghalaya)

Graceland School, Aizawl (Mizoram)

JC Elementary School, Aizawl (Mizoram)

Home Missions School, Aizawl (Mizoram)

Noah’s Foundation School A, Aizawl (Mizoram) 

Noah’s Foundation School B, Aizawl (Mizoram)

RL School Of Education, Aizawl (Mizoram)

Lalmalsawma Memorial School, Aizawl (Mizoram)