Aizawl: Nimin khan khawvel hmun hrang hrang rualin World TB Day chu Tourist Lodge, Chaltlangah hman a ni a, Health Minister Lal Thanzara chu khuallian a ni. Kumin he ni thupui atan hian “Mamawh: TB awm lohna khawvel atan hmahruaitu” tih chu hman a ni. Khuallian Health Minister chuan India ram chu TB vei tamna ber ram a ni tih sawiin, “TB natna um bo tur hian kan tanrual a, hruaitu anga hma kan lak theuh a tul takzet a ni,” a ti a. Mizoram sawrkarin TB dona kawnga hma an lakna hrang hrangte tarlangin, kum 2017 chhunga TB zawnchhuah beihpui an thlaknaa mi singkhat chuang an endik zingah mi 15 chu TB vei an ni tih hmuhchhuah a nih thu a sawi a, sawrkar damdawiin atangin mi 1931 leh Private damdawiin ah mi 44 vei an hmuhchhuah thu a sawi bawk. Minister chuan TB vei dapchhuahna kawngah Central TB Division atangin Medical Mobile Van Mizoram sawrkarin an dawn thu a tarlang a, awlsam zawka TB hrik hmuh chhuah zung zung theihna tur Catridge Based Nucleic Acid Amplification Test (CBNAAT) 7, Civil Hospital Aizawlah leh Medical Mobile Van ah te hmantheih in a awm tawh thu a sawi bawk. Health Minister hian CBNAAT site, Civil Hospital Aizawl chu a hawng nghal bawk.