Aizawl; Aizawl khawpui chhung (Aizawl DTO - Urban) ringawtah thla khata lirthei punna chu 1,500 chuang a tling a, MZ-01 ‘Z’ kal mek zawh hunah MZ-01 ‘AB’-in a kal chhunzawm dawn nia thudawn a ni a. Hetihlai hian tun dinhmuna Aizawl DTO (Urban)-a lirthei awm zat chu 2,41,553 a tling.

VAHAN dashboard-a tar lan, ZALEN-in a zirchian danin tun dinhmunah Mizorama lirthei awm zawng zawng zat chu 3,45,258 (two wheeler 2,23,679) niin, chung zinga 2,41,553 (two wheeler 1,66,514) chu Aizawl DTO (Urban)-a awm a ni.

Kumin 2023 (January - March) chhungin Mizoram pumah lirthei 5,803 (two wheeler 4,143) registration tihthar a awm tawh a, chung zinga 4,023 (two wheeler 3,096) chu Aizawl DTO (Urban) registration a ni.

Mizoram pumah nikumah lirthei registration tihthar 27,165 awmin 2021-ah 25,377, 2020-ah 23,532 leh 2019-ah 31,114 a awm.

Aizawl DTO (Urban) bikah nikum 2022 chhung khan registration tihthar 19,348 awmin 2021-ah 17,316, 2020-ah 15,489 leh 2019-ah 21,718 a awm. 

Aizawl DTO (Urban) hnuaiah MZ-01 Z a kal mek a, chumi a zawh hnuah MZ-01 AB-in a kal chhunzawm dawn niin ZALEN chuan thu a dawng a. Lirthei registration-a hawrawp A-Z zingah O leh I (i) te chu hman tel an ni lo.

Kumin January thla khan Aizawl DTO (Urban)-ah lirthei 1,573 registration tihthar awmin February-ah 1,577 leh March thla kal mekah 873 a awm.

Lirthei dinhmun 
District                 awm zat
Aizawl DTO (01)    2,41,553
Champhai (04)     17,938
Kolasib (05)          19,629
Lawngtlai (07)       8,953
Lunglei (02)          29,853
Mamit (08)            6,379
Siaha (03)              9,213