Aizawl: Aizawl khawpui chuan ni tin bawlhhlawh kg 20,000 aia tam a siamchhuak a, heng bawlhhlawh zinga a tam ber hi polythene (plastic) an ni. Aizawl Municipal Corporation zirchian danin Aizawlin bawlhhlawh paihna atana a hman ber Tuirial dumping ground-ah hian ni tin bawlhhlawh kg 15,900 vel paih a ni a, helai hmuna paihloh te nen nitin kg 20,000 vel siamchhuak thin anga chhut a ni. Science Teachers Association of Mizoram (STAM) ten December 2016 atanga February 2017 inkar chhunga Aizawl khawpui dawr 2408 an zirchianna atanga a lan danin thla khat chhungin dawrkaiten polythene khaina awm chi kg 8500.53 leh a khaina awm lo chi kg 2824.87 an tiral a. Dawr 2408 atanga chhuta 98.4% chuan polythene ip hi anmahni dawrtute an pe a, 1.57% chuan an hralh thung. AMC chuan Aizawl khawpuiah polythene khap tumin ruahmanna a kalpui mek a, Board of Councillors meeting chuan tuna kal dan pangngai hian thla 6 chhung la kal leh phawt nise a ti a ni. Tuiriala bawlhhlawh paihna hmunpuiah hian ni tin truck trip 85 vel bawlhhlawh paih ziah ang a ni a, heng bawlhhlawh atanga hralhchhawn leh theih thir, plastic leh paper lo chhara eizawng hi ni tin mi 40 atanga 50 an awm a. Plastic lamin a nghawng nat ber chu bawlhhlawh chhara eizawngte an ni a, a paihna hmuna thil kang in mut reng an hipluh avangin an hriselnain a tuar hle tih hriat a ni. Hei bakah plastic hian leimin a thlen bakah lui a tibawlhhlawh a, nungchaten nasa takin an tuar bawk a ni. Zalen zawhna chhangin AMC Commissioner Dr. H.Lalthlangliana chuan Tuirial bawlhhlawh paihna a polythene leh bottle ruak te chu thildanga siam (recycling) turin Aromatic Company nen ruahmanna an siam tih sawiin reilo te-ah inremna pawh ziah theih beisei a ni tih a sawi.