DOWNLOAD OUR APP

Read latest news on your phone
app-store
al-Shabab firfiakten Mogadishu khualbuk an luhchilh, mi 10 thi
Aug 21, 2022

Tie te nge al-shabab?

al-Qaeda firfiak pawla inziak lut, al-Shabab hi Somalia-ah hian kum tam tak chhung sawrkar nen an lo indo tawh a. Khauh taka Islam dan kengkawha ram hruai duh pawl an ni.

An pawl hian Somalia chhim lam leh laili lai hmun zau tak an thunun mek a, tun hnaiah sawrkar inbunna leh an thunun lai, Mogadishu leh a chhehvela luh tumin huang an zau nasa hle.

Tun hnai maiah pawh khan Somalia-Ethiopia ramri-ah beihna lian tak tak an thlen a, heng an chetna hian an pawlin hmalak dan tur thar an nei em ni ang tih rinhlelhna pawh a len phah hle.

An pawl chhut chimih tum hian United States pawh a thawk chhuak fo tawh thin a, tun hnai lawkah pawh khan Somalia laili chhim lamah al-Shabab fighter 13 lai thlawhna hmanga beihnaah an that tih an lo puang tawh.

Kum 2011 khan African Union sipaiten Mogadishu bik atang hi an lo um chhuak tawh a, thingtlang lamah erawh bu an la khuar nghet hle a, tun hnaiah khawpui lam hi an awn thar leh mek nia ngaih a ni.

Venhim hna thawktute chuan al-Shabab firfiak pawlin Somali khawpui, Mogadishu-a khualbuk an luhchilhnaah mi 10 an that tawh tih an sawi.

Police chuan beitute hian khualbuk pawn lamah thil vawi hnih an tihpuah hnuah an lut a, silai an hmet puak zui tih an sawi.

Hotel Hayat-a an luh atanga darkar khat hnu velah a chhunga awmte chu a chhawng chung berah an khalh khawm.

Special police unit chuan thawktu leh mikhual eng emaw zat an chhan chhuak tih an insawi.

“Venhim hna thawktuten khualbuk pindana inkhung mi firfiakte tihhlum tumin an bei chhunzawm a. Mi tam zawk chu chhan chhuah an ni a; mahse, civil mi pariat vel an thi tawh chiang a ni,” tiin sorkar hotu lian, Mohamed Abdikadir chuan a sawi.

al-Shabab nena inzawmna nei website pakhat chuan helho hi khualbuk chhungah hian an lut lui a, tum bik pawh nei lovin silai an hmet puak niin an tar lang.

The Hayat hi Somali sorkarin thutkhawm pawimawh a neih tam zawk nghahna thin a ni.

Mogadishu-a Aamin ambulance services hotupa, Abdikadir Abdirahman chuan hliam tuar mi pakuate chu khualbuk atanga phurh chhuah an nih thu Reuters news agency a lo hrilh tawh.

Social media-ah chuan khualbuk atanga meikhu chhuak leh silai puak leh au thawm lanna nasa taka thehdarh a ni a, thil tak tak a ni em tih erawh hriat a ni rih lo.

“Car bomb pahnihin Hotel Hayat hi beih a ni,” tiin police officer pakhatin Reuters hnenah a sawi a. “Pakhat zawk hian khualbuk bula hungna ban a su a, pakhat hian a gate a su bawk a, khualbuk chhungah hian a beitute an la awm niin kan hria,” a ti.

Zirtawpni zan atanga al-Shabab pawlin khualbuk lian an luhchilh hi Somalia-in May thlaa president thar, Hassan Sheikh Mohamud an neih hnua an chetna lian tham hmasa ber a ni a, tharum thawhna tenau deuh erawh an nei fo tawh tho thung.

al-Shabab firfiak pawl hian August, 2020 khan tun ang bawk hian Mogadishu-a khualbuk lian tak an lo luhchilh tawh a, hemi tum hian mi 16 an thi.

India leh Myanmar Border Fencing
India leh Myanmar ramri hung tum chungchang hi eng nge i ngaihdan?
Hung hi tha ka ti lo
Hung se ka ti
Ngaihdan ka nei lo

Latest News & Chhiar Hlawh