La Liga-a rin loh taka che tha, Girona chuan si thum faia Alaves hnehin a chung ber an luah leh ta.

Thawhtanni zana inkhelah Yan Couto pet chu Alaves keeper Antonio Sivera-a’n lo dang mah se Artem Dovbyk-a tan duhthusam niin minute 23-ah hma an hruai nan a thun.

Portu-a’n an goal hnihna thunin Manchester City atanga an hawh, Coutu chuan penalty a hlawh zui a, tun season-a league-a a goal 10 nan Dovbyk-a’n minute 59-ah a chhuih lut.

Ukrainian striker Dovbyk hi an club player man to ber nia hriat a ni a, nipui lai khan Dnipro atangin £ maktaduai 6-a an lak nia sawi a ni.

Michel-a kaihhruai Girona hian point hniha Real Madrid tlansanin hma an hruai leh ta a. A neitu zingah hian City Football Group an tel a, anni hi Manchester City neitu zinga mi tho an ni.

Vawi khat mah nomawi lian tham la la ngai lo Catalan club hian an thenawm, club lian leh hlun zawk, Barcelona chu point kua laiin an falsan tawh a, anni chu pathumnnah an awm mek.

Girona hian Ninganiah Real Betis an hneh a nih chuan Krismas leh season chanve-ah hma hruai chungin hunpui an hmang thei dawn a ni.