International MMA Federation (IMMAF)-in Albania-a World Amateur Mixed Martial Arts Championship a buatsaiha India aiawh tur fighter panga tirh zinga Mizo tlangval a tel a, official pali kal zingah Mizo a tel bawk.

Thawhtanni atanga Tiran, Albania-a championship tan turah hian MMA India National Federation chuan fighter panga tirin featherweight (-65.8 kgs)-a khel turin Mizoram State MMA Association (MISMA) fighter Zarmawia, Chite Veng a tel.

India aiawh tura thlan fighter pangate hi kumin ram pum huap inelna (national event) hrang hranga a tha berte an ni hlawm.

Mizo fighter Zara hi weight pathumah national champion niin India rama record chelhtu ni mek a ni a, LPS leh MISMA tangkawpin huaihawt, Mizoram Fight League (MFL) champion lai a ni bawk.

MISMA President T. Lalrinpuia chuan Zara lakah beiseina sang tak an neih thu a sawi.

“MISMA hian a tum ber chu professional fighter, mahni thiamna hmanga ei zawng thei tur a tam thei ang ber chher chhuah a nih angin Zara hian medal a lak chuan nakkumah professional-a a luh chhoh theihna kawng a inhawng dawn a ni,” a ti.

Albania-a championship huaihawttu, IMMAF hi BRAVE leh UFC nen inthlun zawm a nih angin professional huanga luhna kawng a inhawng zau va, MISMA president chuan IMMAF international medalist 20 chuangin UFC-ah contract an sign tawh thu a sawi.

Zara hi SPES Martial Arts Gym, Aizawlah training-in world championship bik inpuahchah nan hian Bali MMA Gym-ah hun eng emaw chen a training bawk.

Zara te rual hian Mizoram atangin official (referee & judge) turin MISMA Technical Chairman Samuel Lalrozama, Dawrpui chu a kal bawk a, official hi world body-in a thlan an ni ve thung. 

Khawvel huap infiamna pawl (sports federation/association) tam zawkten international referee & judge an neih zinga International Technical Official (ITO) thlan bik an neih thin angin Samuel-a hi IMMAF-in a thlan bik zingah a tel.

Tun tumah hian ITO tur mi 40 thlan niin heng mite hi an senso leh engkim an tumsak an ni dawn.

MISMA hian theih ram pawna zin chhuak turte a lo puih tawh thin angin tun tuma chhuakte pawh hi an Senior Vice President Jeremy L. Pautu chuan pawl aiawhin sum a pai ve ve a, “A tha zawnga khawvel hriata Mizo hming kan pho chhuah theihna kawng a ni,” a ti.