Spotify chuan 'Call Her Daddy' star Alex Cooper chu inremna an ziahpui a, an inremna hi US dollar $mtd 60 (£mtd 43) hu zet a ni. Alex Cooper hi podcaster thang duang tak niin, tunah chuan mi hriat hlawh berte zinga mi a ni der tawh. 

Spotify nen inremna an ziah hnu phei chuan Alex Cooper hi podcaster zinga sum lalut hnem ber pawl ni tura ngaih a ni. Spotify hian podcaster lar leh hlawhtling ber tih ngam Joe Rogan chu inremna an lo ziahpui tawh bawk a, ani bakah hian - Dax Shephard, Michelle leh Barack Obama te pawh an nei - an zingah Alex Cooper a tel thar ta bawk. 

'Call Her Daddy' hi Alexandra Cooper leh Sofia Franklyn te chuan 2018 atang khan an enkawl chho a, he podcast hi a hma chuan Barstool Sports kuta awm a ni thung. Barstool founder David Portno chu merchandise chungchangah a la inrawlh a, mahse   Cooper nen hian inberemin Alex Cooper hian ama pualin a kalpui chho ta a ni. 
he Wealth Circle (TWC) in a tarlan dan chuan podcaster zingah Joe Rogan chu sum lalut hnem ber niin, Karen Kilgariff & Georgia Hardstark te chuan an dawt. UFC lama mi challang tak ni bawk Joe Rogan sum lakluh hi US dollar $mtd 30 vel a ni a, Karen Kilgariff & Georgia Hardstark te sum thawh chhuah pawh $mtd 15 a tling. 

Dave Ramsey chu sum lalut tam pathumnna niin $mtd 10 vel lalut anga ngaih a ni a, Dax Randall ($mtd 9) leh Bill Simmons ($mtd 7) te chu top 5-ah an lang bawk. Top 10-ah hian Chapo Trapnetwork, Tim Dillon, Patrick Hinds & Gillian Pensavalle, Pat Flynn leh Andrew Schulz & Akaash Singh te chu an lang bawk a, tunah chuan Alex Cooper pawhin dinhmun sang tak a luah chho ngeiin a rinawm.