ZALEN, Nov. 14, 2024: Ningania All India Inter Sports Authority of India (SAI) Weightlifting Championships zawh takah Mizoram atanga ritchawi chak kalten medal paruk an la a, Cindy Lalparmawii leh Zosangzuali ten medal pahnih ve ve an la.

Patiala, Punjab-a inelna hi Thawhtanni atanga tan kha niin Khelo India State Centre of Excellence (KISCE), Mualpui, Salem Aizawl atang atangin ritchawi chak SAI, Mission Vengthlang, Aizawl atangin paruk an kal.

Mizoram aiawha kalte hian youth-ah silver pakhat, bronze pathum leh junior women-ah silver leh bronze pakhat ve ve an la.

KISCE atanga kal, Cindy-i hian 76kg youth leh junior-ah kg 119 (snatch-ah kg 54 leh clean & jerk-ah kg 65) chawiin bronze a la a. Zosangzuali hian +81kg (women)-ah youth leh junior-ah kg 137 (snatch-ah kg 62 leh clean & jerk-ah kg 75) chawiin silver medal a la.

Anni bakah hian KISCE atanga kal tho, MH Daniel Beichhuasa chuan 89kg (men) youth-ah kg 224 (snatch-ah kg 93 leh clean & jerk-ah kg 131) chawiin silver a la a. SAI atanga kal, C Lalhruaizeli chuan 55kg (women) youth-ah kg 105 (snatch-ah kg 42 leh clean & jerk-ah kg 63) chawiin bronze a la bawk.

All India Inter SAI Weightlifting Championships 2024-ah hian Mizoram atanga ritchawi chak kalte hi Sports & Youth Services atangin coach Malsawma Khiangte leh SAI atangin coach Om Prakash ten an hruai a ni.