ZALEN, Nov. 7, 2024: Karleh hian Punjab-ah India ram hmun hrang hranga infiam mite inzirna hmun, Sports Authority of India (SAI)-a awm ritchawi chakte inelna lian, All India Inter SAI Weightlifting Championships a awm dawn a, Mizoram atang pawhin player pakua an kal dawn.

Patiala khawpuia inelna neih tur hi Thawhtanni atanga tanin Ningania zawh tur a ni a. Mizoram atang hian Khelo India State Centre of Excellence (KISCE), Aizawla awm mek player pathum leh SAI, Aizawla awm player paruk an tel dawn a ni.

An zinga mi, KISCE-a awm mek, Cindy-i leh Zosangzuali te hi July thlaa Odisha-a Asmita Khelo India Women's League Zone A-ah khan an che tha hle a. Kolasib Saidan nula, Cindy-i hian 76kg huangah youth-ah silver medal leh junior-ah bronze a la.

Keitum nula, Zosangzuali hian +81kg huanga youth-ah silver, +87kg junior-ah gold leh +87kg senior-ah silver a la ve bawk.

Tun tum inelna neih turah hian Player bakah hian KISCE atangin coach Malsawma Khiangte leh SAI atangin coach Om Prakash te an kal bawk ang.

KISCE atanga kal turte:

1. Cindy Lalparmawii (76kg)

2. Zosangzuali (+81kg)

3. Daniel Beihchuasaa (89kg)

SAI atanga kal turte:

1. Malsawmdawngkima (55kg)

2. Zomuansanga (55kg)

3. Benjamin Roluahpuia (61kg)

4. KC Remsiamkima (67kg)

5. Philip Vankhawpuimawia (73kg)

6. Lalhruaizeli (55kg)