English lemchang thiam leh  media personality a nihna piah lama Mizoten Britain’s Got Talent-a judge hmelchhe lo tak, Amanda Louise Holden hi February 16, 1971-a Portsmouth-a piang a ni a. A naupan lai hun tam zawk chu Bishop’s Waltham-ah hun hmangin kum kua a nihin Bishop’s Waltham Little Theatre Company a zawm a. Swanmore Secondary School (tunah chuan Swanmore College a ni tawh)-ah lehkha a zir thin a ni.

Kum 16 mi a nihin Bournemouth-ah an pem a, a hnuah South London lamah pem lehin Mountview Academy of Theatre Arts-ah lemchan lam a zir zui leh ta a ni.

Kum 2007 atang khan ITV-in an tihchhuah, television talent show competition Britain’s Got Talent-ah judge pali zinga pakhat a ni tan a. Tunah hian Heart Breakfast radio show, tuk tin zinga tihchhuah thinah Jamie Theakston nen an host mek bawk.

Holden-i hi musical stage show Thoroughly Modern Millie-ah kum 2004 khan a inlan ve zeuh tawh a, hemi tum hian a che tha a ni ang, Laurence Olivier Award dawng tura chhawp chhuah a ni hial.

ITV drama series Wild at Heart (2006–2008)-ah khan Sarah Trevanion-i lemah hneh takin a chang a. A hmain hnehsawh tak bawkin The Grimleys (1998–2001), Kiss Me Kate (1999–2001), Cutting It (2002–2004), leh Big Top (2009)-ah a lo chang tawh bawk.

ITV tan hian Holden-i hi television show chi hrang hrangah a inlan nasa hle a. Heng zingah hian The Sun Military Awards (2009–2014), Superstar (2012), This Morning (2014–2018), Text Santa (2015) leh Give a Pet a Home (2015) te pawh a tel.

Kum 2013 khan Holden-i hian ama chanchin a ziahna lehkhabu, ‘No Holding Back’ chu a tichhuak a, Sunday Times bestseller a ni ve phak hial a. Zai lamah pawh inhmangin kum 2020 khan a studio album hmasa ber, ‘Songs from My Heart’ a tichhuak a ni.

December 10, 2008 khan record producer Chris Hughes nen an innei a, fa pahnih an nei tawh a, Surrey-ah an chhungkuain an cheng mek.  An inneihna hi Hughes-a in, Babington House, Somerset-ah a ni a. An inneihnaah hian Formula One racing driver David Coulthard chu best man a ni nghe nghe.

English a nih angin football a ngaina hle a, English Premier League football club Everton tantu ruhkawl tak niin a hun neih nen a inmil phawt chuan home leh away inkhel chu a en deuh vek zel.

Sa ei lo mi a ni a, kum 13 mi lek a nih laiin vegetarian a ni ngar ngar.