Health & Family Welfare hnuaia Food Safety Commissioner Office in Mizorama tui siamchhuaktute an tui thianghlim leh thianghlim loh a teh hnua an tlin zawhloh avanga a chawlhtir hnuin tui in tur (pakaged drinking water) siamchhuaktu AMAWII chuan test an paltlang a, tui siamchhuah phalna pek an ni leh tawh. Food Safety Commissioner Office chuan order chhuahin tui in tur siamtu company te an tui a thianghlim tawk loh avanga chawlhtir zingah AMAWII chuan test paltlangin an khuahkhirna tihtawp anih thu an tarlang a. Hetih lai hian tui in tur siamtu dang zawng zawng chuan siamchhuah phalna an la nei ve lo niin department chuan Zalen a hrilh. Food Safety Commissioner Office chuan August, 2017 khan an test-na an paltlang zawh loh avangin AMAWII hi tui siamtu company dangte nen tui siam chhuah hna a tihtawptir a. Hei hi zawmin tui siamtute hian an siamchhuah hna an titawp vek a, dawr lama an pekchhuahte pawh department-in ti tura a tih angin an la let vek a. Thianghlim lehzualin an tui te hi sawngbawl lehin department ah hian tui sample dang chu an thehlut leh a, hei hi September 2017 khan department lam hian State Public Health Laboratory, Guwahati-ah an thawn leh a ni. Sample result ah hian AMAWII tui chu Food Safety & Standards Act, 2006 in a phut ang thlapin a thianghlim ta niin Health department chuan a tarlang a, tunah hian AMAWII hian tui siam chhuah hna leh market-a hralhchhuah theihna turin phalna a nei ta niin department chuan an tarlang bawk.