ZALEN March 30, 2026 : Vawiin khan District Election Officer leh District Municipal Election Officer, Aizawl district ni bawk Er. Lalhriatpuia kaihhruaina hnuaia April ni 21, 2026-a Aizawl Municipal Corporation (AMC) 2026 inthlanpui atana thlirlawkna leh hmalak dan tur sawiho a ni a, report atanga a lan danin Mipa aia hmeichhia an tam zawkna hi vote 19,323 a ni.

He hunan hian Election official tura ruat - Municipal Returning Officers (MROs), Assistant Municipal Returning Officers (AMROs) leh Nodal Officers (NOs) ten AMC 2026 General Election atana an inpuahchah dan thlirhona meeting, DC Office Pisapui Hall-ah an nei. Meeting-ah hian official tin ten an mawhphurhna zawn theuhva an hmalak tawhna leh hmachhawp awm te report an pe. Vawiin tlai dar 3:00 Pm kha candidate inhnukdawh thei hun tawp niin, candidate inhnukdawk an awm loh thu leh Independent Candidate an awm lo thu report-ah hian tarlan a ni.

AMC 2026 General Election-ah hian INC, MNF leh ZPM te chuan Ward 19-ah candidate an nei vek a, BJP erawh chuan Ward 11-ah candidate an nei thung. Candidate te hi an vaiin 68, hmeichhia- 27 leh mipa- 41 an awm. Ward 6 heng: Ward –II,IV,V,XI,XII leh XVII te hi hmeichhe tana reserved ward an ni.

AMC 2026 General Election a hman tur Final Electoral Rolls a voter awm zat chu 239989 niin, hmeichhia – 129656 leh Mipa – 110333 voters an awm. Mipa ai hmeichhia 19323 in an tam. Voter tamna ber Ward hi WARD XVIII niin, voter 18906 an awm a. A tlemna ber Ward hi WARD VIII niin; voters 7975 an awm.