ZALEN April 6, 2026: ZPM General Headquarters chuan vawiin khan an party office-ah chhung inkhawm hun kan hmang a, thusawitu ZPM Adviser Lalnghinglova Hmar chuan, ”AMC inthlan awm turah ZPM kan sawrkar chuan Aizawl khawpui huamchhunga ran vulhna dan kan ennawn ang a, AMC huamchhunga in sak buaipui chhung rei lutuk tih ziaawm nan Building Regulation 2007 ennawnin a tul angin kan siam tha ang,” a ti.

Lalnghinglova Hmar chuan, “Tuna dan kan hman mekah Aizawl khawpui huam chhunga ran vulh phal loh hi ennawn a tul a, veng hrang hrang local council-te nen inrawn tlangin vulh theihna hmun tur leh veng te siamfel a ngai a, hei hi kan ngai pawimawh takzet a ni. In sak buaipui chhung rei lutuk tih ziaawm nan Building Regulation 2007 leh Site Development Modification Regulations, 2017 te ennawnin a tul anga siam that a ni ang a, in sak buai chhung rei lutuk hi mipuite harsatna tawh lian ber pakhat a nih avangin ZPM sawrkar AMC kan siam a nih chuan in sak a awlsam tawh dawn a ni,” a ti.

Tetea Hmar chuan, “Tourism Department leh UD&PA hmalakna hnuaiah zan thum riah daih Aizawl khawpuia Tourism programme kan duang a, hemi hmang hian Aizawl economy chawikan kan tum a, kan tih theih ngei pawh kan ring. Sakawrhmuittuai, Muthi, Durtlang North, Durtlang, Hangi Lunglen Tlang, Laipuitlang, Lammual, Khawhpawp, Ailawng & Reiek, Sailam, Sialsuk, Hmuifang-te Tourist hipna turin kan chei thar dawn a, pawisa pawh kan dawng fel tawh a ni. Khualzinte an hun tam zawk Aizawl-ah an cham theih chuan sum tam tak an thlauh dawn a, chu chu Aizawl mipui, a bikin sumdawngten an chhawr dawn a, sum lengvak a tam ang a, kan zavaiin kan chhawr dawn a ni,” a ti. 

ZPM sawrkar hmalakna hrang hrang sawiin, “Kum 2023 December 8 atanga chhiarin ZPM sawrkar chuan ni 849 kan hmang ta a, term khat, kum 5 hi ni 1826 ni ta se - 46.45% kan hmang tawh a ni. Term kal mekah ni 977 a la awm a, June 9 hian term zahve kan thleng ang. Heng kum hnih chhung hian inzir chawp chungin, theihtawp kan chhuah a, duhthusam ni lo mahse Pathian zarah hmasawnna hmuh tur tam tak leh danglamna kan hmu tawh a ni. Sawrkar lai thawhpui thei tur AMC thlan a ngai a, Aizawl khawpui hian AMC tha zawk a mamawh a, Aizawl mipuite hian AMC tha zawk kan phu a ni." 

"Mizoram sawrkar hnuaia department hrang hrangah danglamna tam tak a thleng mek a, Aikal tihtawp te, Advertisement chhuah ngeia hna lak te, Smuggler huangtuau te nawrchep an ni a, Buhfai buk dik a ni a, Power bill a huna kan pek tak avangin lawmman (Rebate) te kan dawng ta hial a, Pension chungchang ringawt pawh sawi tham a awm. MNF hunlai khan kum 5 chhungin pensioner 900 vel an tifel hman tawk a, ZPM sawrkar hnuah pensioner 23,000 zet tihfel a ni theite hi a lawmawm takzet. MUCHS chungchangah Kohhran pawhin min phurpuite hi a lawmawm takzet a, Aizawl mipuite hian Health Care tha hi an phu reng a ni. Aizawl tha zawk dinpui turin mipuite an sawm a che u,” a ti.