ZALEN April 13, 2026: ZPM party chuan vawiin kahn chhung inkhawm an hmang a, thusawitu Dr.Vanlalthlana, Adviser, ZPM General Headquarters chuan sawrkar thlak danglam thei neutral thil tha duh an awm chu an vanneih phah a ti a, AMC-a seat awm zawng zawng an lak a rinawm niin a sawi bawk.

Dr. vanlalthlana chuan, “Politics-ah sawrkar thlak danglam thei neutral thil tha duh kan nei thin hi kan vannei a, tunah pawh awn lam nei lo mipui tam takin Kalphungthar mipui sawrkar hmalakna leh hlimthla an hmuh vangin ZPM tan an rawn au chhuak mek a ni. Neutral-in aw an neih hian ramin a thatpui thin a, Kohhranten thuchhuah an neih pheih chuan beng kan dawh a, ramin kalphung dik a zawh thin a, Kohhran leh mipuite chungah lawmthu kan sawi,” a ti.

Dr.Vanlalthlana chuan, “Kan hma lawka AMC inthlan lo awm turah hian kan that bik em em vang ni lovin Lunglei Municipal inthlan boruak ang mai khan seat zawng zawng kan lak mai theih a rinawm a. Veng tinah ZPM chu kan campaign dan a dang a, party dang te hian kalpunghlui hmangin bawlhlawh takin an la campaign zel. Hetiang anih chuan thil tha duh leh ram tha duh te hi kan sawm leh thlem luh ni lovin ZPM-ah an lo la kal zelin ka ring. 

Party tinah hian ram vei tak tak, thil tha duh an awm vek a. Kan hotu lu berten min kaihhruai dan hian awmzia a nei thui hle a ni. ZPM-ah chuan kan Chief Minister hian thil tha a duh a, a vei bawk a. Minister leh MLA-ten amah entawnin a fim thei ang berin kan kal a, ZPM chuan danglamna kan rawn dinchhuah pui ta a ni. Congress phei chuan an party boruak nguai deuh intihharh nan ti ni awm takin min bei chiam chiam reng a, hengte hian min ti tangin thahnem min ngaihtir thin a, min fuihtu tha tak an ni,” a ti bawk.