ZALEN November 24, 2024 : Aizawl Municipal Corporation (AMC) huam chhungah kumin chhungin leivung paih phal lohna hmuna paih mi 51 man an awm a, phal lohnaa bawlhhlawh paih pawh mi thahnem tak man an awm bawk.

AMC hotute hnen atanga ZALEN thudawn danin kumin kum kal mek chhungin AMC huam chhungah phal lohnaa leivung paih an man mi 51-te pawisa chawi tling khawm chu Rs. 2,55,000 a tling a, bawlhhlawh paih an mante pawisa chawi tling khawm pawh Rs. 1,05,000 a tling.

Heng bakah hian soak pit nei lo pawisa chawitir tling khawm Rs. 2,000 tling bawkin vawk vulh rim chhia pawisa chawitir Rs. 2,000 a tling.

AMC chuan chhiatna leh nunna chân palhna a thlen lohna turin July - October chhungin lei laih leh leivung hmanga ruam/kawr chhun a khap thin a, hei hi kalpui mek a la ni.

Khap chhan hi Mizorama fur laia lei laih vanga chhiatna leh nunna chânna thleng thin venna tur a ni.

Lei laih leh leivung paih khapna AMC-in a siam bawhchhia hremna pek hi awm thim mah se a tlangpuiin mipuiin an zawm tha hle niin AMC chuan a hria.

Hetihlai hian AMC huam chhungah lei vung paih phalna hmun riat awmin, chungte chu Tuirial Road, Near RD Godown, Zemabawk te, World Bank Road, (Near College Veng Thlanmual road) ITI te, Durtlang Leitan, (Near Bethel Camping Centre), Govt. Complex, Durtlang Leitan (Zuangtui Selesih Road), World Bank Road (Near Zampuimanga Thlan) Melthum, Luangmual (Near Govt. Complex), Luangmual (Near Govt. Complex) te a ni.