ZALEN September 22, 2024 : Food Civil Supplies & Consumer Affairs Department chuan Aizawl Municipal Corporation (AMC) huam chhungah ration card ennawn hna a kalpui mek a, zawh fel a nih hunah a tahtawlin district dangah kalpui a ni ang. ‘Sem sem dam dam, ei bil thi thi ti thin, Mizo hnam hian ration card dik neih i tum ang u,’ tiin supply department-in ngenna a siam.

FCS&CA director-in tun hnaia circular a tihchhuaha tarlan a nih danin veng tina dinhmun harsa, chhuanchham thei dinhmuna ding leh khawsak phunga chhawmdawl ngaite, sawipuitu nei ve lo puih ngai ngawih ngawihte tan, veng tin NFSA Selection Committee rilru zau tak pu tura ngen an ni.

NFSA beneficiary thlan dan tur tehfung (eligibility criteria) zul zuiin, card eng (AAY)-ah rethei zual bik (extremely poor)-te thlan tur an ni a, card pawl (PHH)-ah rethei leh chhawmdawl ngai, sawrkar puihna tel loa buhfai khamkhawp lei zo meuh lo te telh tur an ni.

NFSA beneficiary thlan chhuahte list chu veng chhungah a duh apiang tana en theih, complaint theihna tar chhuah tur a ni a, a tlem berah kar khat chhung tar chhuah tur a ni.

Food security buhfai dawng thei tur dinhmun harsate thlauhthlak sawrkarin a hlau hle tih supply department director circular-ah chuan tar lan niin, “Sem sem dam dam, ei bil thi thi ti thin, Mizo hnam hian ration card dik neih tum i la, pachhia leh chhawmdawl ngai ten an chanvo dik tak an chan theih nan i thawkho ang u,” tiin tarlan a ni bawk.

Hetihlai hian ration card var neitute tana subsidy rate thar chu October, 2024 atangin Mizoram pumah kalpui tan a ni tawh dawn a, sawrkarin card var tana subsidy Rs. 25 a pek thin chu thla thar, October atangin Rs. 10 a pe tawh ang a, hemi vang hian Mizoram pumah card var ho tan buhfai khul man kg.-ah Rs. 30 a ni tawh ang. October atang vekin retailer te lawmman pawh buhfai kg.-a duli (pawisa 50) ni thin chu Rs.1.50-ah tihsan a ni ang.