Aizawl; AMC Councillor Rosiamngheta chuan AMC namthluk chhan chu MLA leh MP inthlan chakloh thinrim rahchhuah niin a sawi. Nimin khan Aizawl Press Club ah chanchinbumite kawmin Rosiamngheta chuan AMC buaina chu ZNP President Lalduhawma'n MLA inthlan zawh, December 2013 a amah a biakna atangin ani tih a sawi a. Amah chu an party in tum hnih an phatsan/thlim tih a sawi a, "December 16,2013 khan kan sawiho thlap hnu ah DC hnenah AMC sawrkar rintawklohna ka thehlut a, mahse hei hi ka hriat miah lohin ka thawhpui mi 2 te chuan December 19,2013 ah an lo withdraw leh daih a. MP thlan zawh khan AMC namthluk tumna a ri leh a, keini MPC Councillor te pawh kan kalkhawm a 'sawrkar namthlu lo a thlawp nise' kan tih laiin kan rorel ang ni lovin thil an rawn ti leh a, chuvangin mi phatsan chingte nen awmho ai chuan ka indan san ta a, 'Old Age Home' ka chhuahsan ta a ni," a ti. Rosiamngheta chuan MPC a chhuahsan avangin a uire lo tih a sawi a, "ka party pui ngeite phatsan ka nih avangin ka chhuahsan lo thei lo a. Min thlangtute ka zah avangin AMC session zawng zawng ka kal kim a, Committee peng hrang hranga ka mawhphurhna hlen loh ka nei lo a, thlan anga thawk thalo te hi thlangtu mipuite zahlo leh uire an ni zawk," a ti. AMC namthlukna ah ZNP President Lalduhawma chu a mawhphurtu ah a puh a, ZNP President chu 'Politician dazat' tiin, "Ka hriat chian chinah pawh hian Mihim (stable and secured person) a ni lo," a ti. Rosiamngheta chuan Chairman tura sawmna leh thlemna a tawk lo tih a sawi bawk a, "min lei nia sawitute hian fiahna an neih chuan rawn phawrh se ka duh a ni," a ti bawk. Rosiamngheta chuan AMC Licensing Regulations 2012 chu tih hlawhtlin ngei tha a tih thu nimin Press mite a kawmna ah zawhna chhangin a sawi a. MIMA leh NGO te duhdan anga thil kalpui chu a hlauhawm thei tih sawiin, "Miin Court ah an kalpui chuan sumdawnna kawng zau tak a inhawng thei a, chuvangin sakeibaknei mu lai hi kan kaitho ang tih ka hlau a ni," a ti. He dan, mi thenkhat ten an dodal chhan chu fee chhunluh an hreh vang mai nia a hriat thu leh fee chu tam a ni lo a, a sang ber pawhin kum 1 ah Rs.3000 chauh an pe dawn niin a sawi bawk.