Aizawl; Dawrpui Vengthar veng chhung inkalpawhna tura kawng thar an siam, Council Bypass chu nimin khan AMC Chairman CT Zakhuma'n ribbon chep chatin a hawng. He kawng thar hmang hian Vaivakawn-Bungkawn kawng leh Vaivakawn-Temple kawng te chu awlsam taka inkalpawh theih a ni tawh a. February ni 8, 2012 atang khan hmun rualrem lo takah bul tan niin, June ni 24, 2014 khan zawh fel a ni. Kawng siamna senso hi 13th Finance Commission grant atangin hmuh a ni a, Council Bypass-ah hian medium vehicle chin kal theih tura ruahman a ni a, a zau zawng hi metre 3 niin, a sei zawng chu metre 67 a ni. Kawng siamnan hian sum senso tawh chu cheng nuai 27.336 niin, Primary School siamthatna atana sum dah cheng nuai 8.07 a la awm bawk a, hei hi zawh a nih hunah chuan sum senral zawng zawng hi cheng nuai 35.406 a ni ang. Laldinliana, Chairman, Local Council, Dawrpui Vengthar kaihhruaina hnuaiah hawnna inkhawm tawi neih a ni a, Pastor R Lallianpara, Dawrpui Vengthar Bialtu Pastor chuan hunserh hmang in he kawng hi Pathian hnenah a hlan a ni. Hemi hnu hian Zohmingthanga, EE, AMC chuan technical report pe in, W Chhuanawma, Councillor, AMC-in thu a sawi bawk.