ZALEN October 18, 2023 : Vawiin khan kum 2023 MLA General Election lo awm tur atana Aizawl South III MNF Campaign Kick-off chu Sialsuk-ah neih a ni a, AMC Corporator Chuauzikpuii chuan he hun hi a hmanpui a, Mizoramah MNF party inrelbawlna a tha ber niin a sawi.

AMC Corporator," Chhungkaw inrelbawlna tha atangin mi tha an chhuak thin angin Mizoramah MNF Party inrelbawlna a tha ber a. Hei hi kan sawrkar lehna chhan tur tha tak a ni," a ti.

AMC Corporator chuan, "Vawiina in biala Candidate-te hi an awmna turah an awm em? An thawh tur thawk lovin thil dang an ti daih em tih uluk takin lo zir rawh u. Tin, Bial mipuiten lo chik ula ka duh em em bawk chu tuna in MLA, kan Candidate ni leh ta Pu Mawitea hi a candidate puite aia mahni mawhphurhna hlen tha ber a ni em," a ti a. Hneh taka MNF Official Candidate thlang tling leh turin Aizawl South III mipuite a sawm a ni.

Aizawl South III bialtu MLA leh Kum 2023 inthlan atana MNF Official Candidate Prof. F. Lalnunmawia pawn thu sawiin, "Vawiinah Campaign Kick off programme hlawhtling taka kan nei thei hi a lawmawm hle a. Nimin lamah Party dangten bial pawn lam thlenga inchah khawmin hun an hmang tawh a. Keini chuan lan tam duh vangin bial pawn mi kan chahlut ve lo a. Bial chhung mi ngei heti zat kan kal thei hi a lawmawm hle a ni," a ti.

Aizawl South III MNF Official Candidate chuan, "Tuna hmachhawp kan neih mekte bakah ka MLA hma atang tawha Sports atana sponsorship kan inpek thin hi mumal takin term thar atang chuan kan ruahman dawn a. Zone Football leh Volleyball tan leh Discipline dang atana hman turin MLA fund pawh kan ruahman dawn a ni," a ti.