Aizawl: November ni 1-11,2016 inkar chhunga India ram khawpui hrang hrang tlawhtu AMC Councillor te chuan zin hlawk an inti hle a, an khawpui tlawh hrang hranga mipui ten khawpui enkawltute thu an zawm thiam chu fakawm leh entawn tlak an tih thu an sawi. AMC Councillor rual mi 12 leh official mi 3 te hian November ni 1-11,2016 chhung khan Shimla, Chandigarh, Dehradun/Mussoorie leh Jaipur te tlawhin khawpui sawrkar rorelna kalphung, bawlhhlawh lakkhawm leh sawngbawl, lirthei parking leh stand kalphung, building sak enkawl dan, footpath leh street light zirchian nante hun an hmang a ni. Councillor rualte hian nimin chhun dar 12 khan Aizawl Press Club ah chanchinbumite kawmin study tour hruaitu AMC Dy. Mayor Lalringliana chuan heng khawpui hrang hrang an tlawh a Municipal hmalakna entawn tur awmte an zirchiang tih a sawi a. Shimla khawpuia kea kalna an siam te, khawpui an vawnfai dante, ramngaw an humhalh dan leh bawlhhlawh an sawngbawl dan te chu entawn tlak a tih thu a sawi a. Chandigarh khawpui 40% lai ngaw a ni thei te, smart phone hmanga parking an ruahman te, CCTV an vuah te chu rualawhthlak a tih thu sawiin Mussoorie khawpui a park an siam chu Corporation tan sum lakluhna tha tak a ni tiin Jaipur ah chuan Municipal te chu kawng engkimah an inrawlh niin a sawi. Councillor rual te chuan an zinna a an thilhmuh te chu a theih chin chinah Aizawl ah pawh tih hlawhtlin nghal tum zel a ni tih sawiin street light tha zawka vuah dan leh mipui hnena man tlawm hralh dan tur an sawiho tawh bakah parking chungchang pawh naktip Thawhlehni hian an sawiho dawn niin an sawi bawk.