ZALEN September 24, 2025: Aizawl Municipal Corporation huam chhunge Ward 19-te Draft Electoral Rolls chu vawiin hian mipuite en theih turin tarchhuah a ni a, vote nei zawng zawng 2,34,600 an ni a, mipa aia hmeichhe tamna vote 17,302 a ni.

Draft Electoral Rolls tihchhuah tharah hian Ward 19 zingah Ward XVIII chu vote tamna ber niin vote 18779 a awm a, mipa 8697 an ni a, hmeichhia 10082 an awm a, an inthlauhna 1,385 a ni, he ward-ah hian Salem Veng, Venghnuai, Model Veng, Thakthing, ITI, Dam Veng, Mission Veng leh Tuikhuahtlang te an awm. Armed Veng, Armed Veng South leh Chite Veng te awmna Ward VIII chu vote tlemna ber niin vote 7698 a awm a, mipa vote 3559 leh hmeichhia vote 4139 an awm. Ward XVIII-ah hian Ward VIII let aia tam vote a awm.

Chaltlang, Chaltlang Lily Veng, Bawngkawn leh Bawngkawn South te awmna Ward II chu vote tam lama pahnihna an ni a, Zemabawk, Zemabawk North, Falkland leh Thuampui te awmna Ward VII chu vote tam lama pathumna an ni. Dawrpui Vengthar, Vaivakawn leh Kanan te awmna Ward XIII chu vote tlem lama pahnih an ni a, Chanmari West, Edenthar leh Hunthar awmna Ward VI chu vote tlem pathumna an ni.

Aizawl Municipal Corporation hnuaia Ward 19-ah hian Hmeichhia aian mipa tlemna ward pakhatmah a awm lo. Ward zingah hian vote singkhat tlin lohna ward pathum a awm. 

Tun tum AMC Draft Electoral Roll hi MLA Roll 2022 behchhana siam a ni. Dt.25.09.2025 atanga Dt.25.10.2025 thleng Electoral Roll atanga hming paih, thun thar, siamthat ngai leh insawn duhte tan dilna (claims and objections), Local Level Officer (LLO) hnenah thebluhna hun hawn a ni ang.